جديد الموقع اسطوانات وزارة التربية والتعليم وتطبيقات للموبايل

مش حتقدر تغمض عنيك

عرض المادة
مش حتقدر تغمض عنيك
5136 زائر
05-01-2017

مش حتقدر تغمض عنيك
للدكتور حازم شومان

الحمد لله وكفى وصلاة وسلام على عباده الذين اصطفى
اللهم لك الحمد كله
اللهم لك الحمد كله
اللهم لك الحمد على نعمه الايمان اللهم لك الحمد على نعمه الاسلام اللهم لك الحمد على نعمه القرءان يااكرم الاكرامين
اللهم لك الحمد كله ولك الملك كله و بيدك الخير كله واليك يرجع الامر كله
اللهم صلى على عبدك ونبيك وحبيبك ووليك وصفيك وخليلك ورسولك محمد صلى الله عليه وسلم
فى الاولاين والاخرين والملآْ الاعلى الى يوم الدين عدد خلقك ورضا نفسك وزنت عرشك ومداد كلاماتك كان بين الناس رجلا وبين الرجال بطلا وكان من الابطال مثلا فعليه افضل الصلوات من رب العالمين الى يوم الدين ثم اما بعد

من فترة قريبة كنت رايح اصلى الفجر وانا رايح اصلى الفجر فانتبهت انه على يمينى سايبر مفتوح ساعه الاذان فات على الاذان ربع ساعه ثلث ساعه يدوبك على الاقامه فببص فى السايبر فؤجت باحد الاخوة سبحان الله نبهنى بالسايبر فؤجت ب15 -20 شاب قاعدين جوه كل واحد قاعد على الكمبيوتر السيجارة فى ايده اليمين والماوس فى ايديه الشمال عنيه متوجه على السايبر دخلت جوه السايبر فببص 90 % قاعدين قدام جميز وفى قاعد قدام شات وفى قدام فيلم او كليب ياجماعه ياخوانا الفجر ادن انا بحسب يقولوا ادن معقول يروحوا جارين اتنين ثلاثة بصولى من فوق لتحت ورجعواتانى والباقى مبصش يااخونا ربنا الفجر ادن ربنا بينادى عليكم ولاواحد بص ياجماعه حد يبصلى ياجماعه حد يرد عليا ولاواحد بص يا انتم دلوقتى قاعدين قدام جيمز قدام لعبه وربنا بينادى حد يسيب ربنا علشان لعبه حتقول ايه لربنا سبحانه وتعالى يوم القيامه لما يقولك مجتليش ليه حتقوله علشان لعبه يارب مش قادر يقوم هى دى النقطة انتم عارفين احساس الداعيه ايه لما بيقوم يكلم الناس عن ربنا عارفين احساس الداعيه لو هو مخلص وبيكلم الناس عن الاخره عن الجنه والنار عارفين لما بيروح يهدى شاب او واحد علشان ميعصيش ربنا عارفين عامل زى ايه
زى المريض اللى فى العنايه المركزة حاله المريض بتتدهور وبتنزل نبض القلب بقى غير منتظم والجهاز بدأ يصفر والممرضات بدوا يجروا عليه يحاولوا ينعشوه باى حاجة والممرضة جريت على الدكتور الدكتور جه جرى على المريض لقى الحاله بتنزل بسرعه اجرى هاتى الحقنه الفلانية اجرى بسرعه علقى المحلول الفلانى اجرى بسرعه هاتى الجهاز الفلانى اجرى بسرعه هات جهاز الكهربا بدا يعرض القلب للصدمات الكهربائية وبقى الدكتور وهو بيعرق ومتوتر عايز ينقذ العيان باى طريقة بداوأ يكتشفوا ان العيان دة خلاص مينفعش لازم يدخل اوضه العمليات فورا والا حيموت فى لحظات فى ثوانى والدكتور قدامه بيحاول ينقذه باى طريقه وكل ثانيه عنيه على الجهاز اللى بيحدد نبض المريض ياينقذه ياميتنقذ لومات العيان ساعاتها يبقى نفس تفلتت منى الى النار يااخونا هوده احساس الداعيه هو ده احساس اللى رايح يدعو الى الله اللى بيحاول ينقذ واحد باى طريقه حاسس بانه اللى قدامه فى خطر حاسس انه اللى قدامه حيضيع لو ماسمع كلامه حاسس انه شايف حاجة خطيرة ماهوله كانه باب من السماء اتفتح شاف حاجة رهيبه وبيحذر اللى قدامه والله العظيم انا شفت بعينى انا بحذرك من حاجة انا متأكد انها موجودة اللى انت بتعمله حيضيعك يايستجيب ياميستجبش يايفوق ياميفوقش احنا دلوقتى يااخونا فى عصر الفتنه عصر لاينطبق عليه الا عصر الفتنه
الفتنه بقت رهيبة بقت ماهولة تموج كموج البحر الواحد دلوقتى ممكن يسمع 100 درس عن الخشوع فى الصلاة ومش قادر يخشع طب ماالسلف كان الخشوع فى الصلاة عندهم سهل مش قادر ليه مش قادر من كتر الفتن اللى حوليك فتن شهوات فتن فلوس فتن مراكز فتن مناصب فتن كراسى فتن عربيات العيون بتخطف مع العربيات ومع المحاميل ومع الابراج اللى طالعة ومع الاغنياء اللى هما معدين ومع اصحاب المراكز ومع فلانة اللى ماشية لابسة ايه ومع فلانة اللى معدية ولابسة ايه ومع المذيعة اللى بتطلع فى القناة الفلانية والجرايد الصفرا ء اللى بتجيب صور فاضحة فى كل مرة العيون مخطوفة كله بيجرى كله ملهوف كله مبيفكرش كله فى غيبوبة وقاعد بيجرى وكل واحد بيقع الباقى مبيفكرش فيه مابيقفش يقول دة مات ليه دة راح فين دة بيحصله ايه دة بيتحاسب ازاى احنا فى فتنة يااخوانا عصر الفتن عصر من الشهوات الرهيبة المصيبة دلوقتى ان عاد عند الملتزمين حتى فى تطبيع مابين الطاعة والمعصية
الطاعة والمعصية بقت فى حياتنا عادى عادى امهاتنا دلوقتى وابئانا واهالينا ممكن يفتح القناة الاسلامية يتفرج على الداعيه
الداعيه حيموت قدامه وهو بيدعوه الى الله يتفرج على البرنامج اقلبولنا بقى على القناة الفلانية او التمثلية الفلانية او قناة الاغانى الفلانية عادى جدا تطبيع عادى جدا لا للتطبيع مابين الطاعة والمعصية لا لاى تطبيع بين الطاعة والمعصية فى حياتنا عادى جدا ان البنت تنزل حطه ايشارب على راسها وبتحط مكياج ازاى دة جنب دة ازاى طاعه جنب معصية ازاى ؟؟
ازاى انسان ملتزم طول حياته راجل بينزل يصلى الفجر فى الجامع لما بينته تيجى تتزوج يجيب راقصة ويجيب فرقة ازاى ياجماعة
ازاى احنا وصلنا للوضع دة ازاى التطبيع مابين الطاعة والمعصية فى حياتنا ؟؟
التاجر يقولك انا مبكلش الا لقمة حلال ويحط فلوسه فى البنك وياكل ربا البنوك ازاى يااخونا
الفتنة اللى احنا عايشين فيها من عدة ايام بصلى فى الجامع ببص من باب الجامع لقيت محل على الرصيف التانى فاتح انا فزعت خرجت مفزوع الراجل حاطط صور بنات كاسيات عاريات على المحل على اليافته بتاعت المحل وفى وش الجامع يعنى اللى يدخل يطيع ربنا يخرج يبص فى الصور تضيع حسنات الصلاة فخرجت من الجامع رحتله لقيت واقف قولتله السلام عليكم حضرتك صاحب المحل قالى اه قولتله ايه ده انت مش عارف اى حد معدى حيبص للصورة دى فى ميزان حسناتك انت قالى واللهى انا اعمل ايه دة انا كنت حاطط الصورة دى على اليمين فجبتها على الشمال شمال ايه ويمين ايه ؟هو مع ربنا فيه يمين وشمال!!!!!!! لا اله الا الله احنا بنروغ روغان الثعالب مع الملك سبحانه وتعالى قولتله ايه ده قالى دة والله كوافير حريمى بس انا مبحطش ايدى فى شعر واحدة دة البنات هما اللى بيعملوا كدة وانا بشرف بس لاحول ولاقوة الا بالله دة انا بكفل يتامى بتكفل يتامى من مال حرام ازاى ان الله طيب لا يقبل الا طيبا انت بتتكلم فى ايه انت تعرف يعنى ايه مال حرام؟؟؟؟؟؟؟؟
مال حرام يعنى الدم اللى بيغذى كبدك حرام الدم اللى بيغذى قلبك حرام الدم اللى بيغذى رئتك حرام لو المال الحرام دة طلع سرطان فى الكبد لو المال الحرام دة عمل ذبحة صدرية لو المال الحرام دة عمل فشل كلوى حتعمل ايه وفلوس ايه اللى حتعالجوه قالى طب اسبوع واحد بس اسيب الصورة اسبوع وبعد كدة لاحول ولاقوة الا بالله عقبال ماالافتتاح يجى والناس تنجذب بالصورة انت بتاخد الرزق من الصورة دى ولا الملك اللى بيرزقك اللى مستوى على عرشه من فوق سبع سموات هو اللى بيرزقك هى دى مشكلتنا ماهو مش قادر حاسس انه شبكه ومتحوط بيها يعنى قبلت شاب وبنت واقفين بيحبوا بعض خدته على جنب وقولتله ياحبيبى بتحبها قالى اة بحبها
لو بتحبها خاف عليها يابنى انت كدة بتوديها جهنم فى حد بيحب حد يوديه جهنم وخاف على نفسك انت حتودى نفسك جهنم اخر الكلام بيقولى انا مقتنع بس مش قادر مش قادر يتغير
ياخوانا الصرخة اللى كل داعية بيصرخها فى اى واحد فى الزمن اللى احنا فيه وصلنا دلوقتى زمن اللى النبى صلى الله عليه وسلم
(يصبح المرء مؤمنا ويمسى كافر ويمسى مؤمنا ويصبح كافرا يبيع دينه بعرض من الدنيا )
يبيع دين ه دينه بقى سلعه تباع وتشترى دينه بقى عرضة انه حاجة يتساوم عليها ومين اللى يدفع اكثر ليه وعلشان ايه بعرض من الدنيا فيه اللى بيبيع دينه علشان بنت وفى اللىبتبيع دينها علشان ولد وفى اللى بيبيع دينه علشان اغنيه واللى بيبيع دينه علشان اصحابه مجدعة يعنى كان فى مستشفى الطوارى فى شاب يعنى ايام ماكنا فى سنه امتياز فى سنة امتياز شبه كل يومين اربع ايام تتقطع كل حته فى جسمه وعايز ياخد غرس فانا مش عارف دة ايه دة مين اكتشفت بعد كدة فى مرة من المرات ان كل التقطيع بتاعه ده مجدعة ليه اصحاب لودخلوا شكله فيها مطاوى يصدر صدره فيها صحابى محدش يضربهم
وكل شوية يجى فيها يعنى يخرب بيت المجدعة اللى تودى جهنم مجدعة ايه ياخونا هى المجدعة دى تنفع فى جهنم يبيع دينه علشان قهوة يبيع دينه علشان سايبر يبيع دينه علشان اتيله يبيع نفسه علشان صفقه حرام يبيع دينه علشان اى فتنه واى معصية هودة الزمن اللى عايشين فيه طب ونعمل ايه !!!!!!!!
الصرخة اللى كل داعية بيصرخها فى الناس دلوقتى
مش حتقدر مش حتقدرى مش حتقدر تغمض عنيك هو دة موضوعنا الليلة
مش حتقدر مش حتقدرى واللهى العظيم مش حقدر يعنى ايه انت معتقد ايه ياجماعة كمية الفتن اللى حوالينا بقت رهيبة اللى حيبص بس مش حيبص بس مش حيقدر يغمض عنيه حيتسحب متساق بعد كدة الشيطان يتحكم فيه حيسلب ايرادته اللى حيبص بعد كدة للفتن للابراج اللى بتطلع اللى حيبص للبنات اللى فى الشارع والشباب اللى راكب العربيه الباور ولو فى ساحة الجامعة وحيقلب فى القنوات الغير اسلامية وحيشترى الجرايد الصفرا والعلامانية وحيدخل على المواقع الاباحية على الانترنت معدش حيقدر خلاص انتهى مش حيقدر يرجع الا بمعجزة من الله مش حتقدر تغمض عنيك دة شعار لاهل الباطل دلوقتى حقيقة دة مش شعار انا مش عايز اقول دة هما ربنا يهديهم قالوا الشعار دة تدخل تلاقى الكلمة مكتوبة يعنى لودخلت ضايع ..ضايع يعنى لو بصيت ضايع ..ضايع يعنى دى سكه اللى يروح ميرجعش احنا بنقولك من قبلها اهو اللى بيدخل هنا مبيرجعش
بيضيع مستعد تضيع ادخل مستعد تنتهى ادخل مستعد تدمر ادخل مستعد تنهى علاقتك بربنا ادخل بايع صلتك بالله ادخل بنقولهالك من الاول بيحذروك منهم من الاول مش حتقدر تغمض عنيك انسى محدش كبير على الفتن
ياجماعة ياشباب ياامهات يااطفال ياجماعة ياكل مسلم واللهى محدش كبير على الفتن يادعاة ياعلماء ياقوامين ياصوامين ياملتزمين يامنقبات يامسدلات محدش كبير على الفتن دة الكلام دة مش كلامنا ولا كلام القناة الفلانية دة كلام من 1400 سنه قالوهلنا
سيدنا محمد من 1400 سنة قال مش حتقدر تغمض عنيك ايوة والله ياجماعة دة كلام ربنا
قال رسول الله صلى الله عليه وسلم
(لاتفتح فانك ان تفتح تلج)
اوعى تفتح باب الفتنة على نفسك لو فتحتة حتقع حتقع اوعى تفتحى باب الفتنة على نفسك مش حتقدرى ياجماعة يالى مطبيعين فى حياتكم مابين الطاعة والمعصية مينفعش يالى مطبيعين فى حياتكم مابين عمل اهل الجنة واهل النار مينفعش ياحاج يالى بتصلى الفجر فى الجامع وفرح بنتك ارتكب فيه كمية سيئات تضيع من غير صلاة والعياذ بالله ياامى يالى بتتفرجى على القنوات الاسلامية عادى والقنوات الثانية عادى يالى الحجاب بتاعك مختلط بالمكياج
يااخوانا يالى قاعد تقلب يالى الدش بتاعك عليه قنوات دينية وقنوات تانية ضايعة ازاى يااخوانا ازاى بقى عادى عادى مين فينا سلم لله مين فينا حياته لربنا مين المستقيم على طريق ربنا علشان يوصل لربنا سبحانه وتعالى مين الملتزمسن الجادين يااخوانا الدين دين يعنى الدين معناته كل حاجة دين اللى عنده دين فى العبادات اللى عندة دين فى صلاةالفجر حاضر زى ماعندة فى اخلاقة مع مراته وجيرانة فى الفلوس اللى بيكسبها بالحلال زى ماعنده دين فى المصايف اللى بيروحها فى الصيف زى ماعنده دين فى الفصح زى ماعنده دين فى علاقاته مع الناس واخلاقة زى ماعندة دين فى المعاملات المادية
اللى عنده دين عنده دين فى كل حاجة زى ماعنده دين مع اصحابه اللى بينتقى نوعية اصحابة اللى ماشى معاهم مش حتقدر تغمض عنيك يااخوانا لاتفتح لو فتحت على نفسك باب فتنة مش حتقدر تقفلة بعد كدة خلاص مش حتقدر تغمض عنيك ولا تغمض قلبك اول كل علاقة زنا كانت نظرة واحدة او كل علاقة حرام كانت مكاالمة هاتفية واحدة او كل زواج الكترونى كانت دخلة واحدة على موقع اباحى اوكل علاقة منحلة كانت نظرة واحدة ولافى ساحة الجامعة ولا اخلاق نظرة فى الشارع اول كل مدمن كانت سيجارة اول كل مرتشى كان جنية واحد قبله حرام اول كل زعيم عصابة كان شلن واحد قبل انه يدخل جيبة حرام
انا عايز اسالك/ انا عايز اسالك كام مرة قولتى دى احر مرة خلاص ومبقتش اخر مرة دى مرة وحتعدى اخر مرة دى مكنتش اخر مرة
كنت اسمع ناس زمان تقول انا حجرب الغلط حجرب الحرام علشان لما التزم ابقى التزمت وانا مجرب الغلط
هما دول موضوع درس الليلة عايز اعرف الاتنين الصح والغلط ابقى عارف دة ودة هما دول اهل الاعراف دى معرفة بكل حاجة علشان لما اجرب الصح معدتش ارجع للغلط تانى ياحسرتاه!!!!!! دول يوم القيامة حيلاقوا نفسهم فين اللى حياته عادى كانت ساعة طاعة وساعة معصية هما دول اهل الاعراف اللى ربنا اتكلم عنهم فى الاخرة اللى سمى سورة باسمهم من اكبر سور القرءان هما دول اهل الاعراف اللى ساعة وساعة اللى عادى الموضوع بسيط اللى الباب موارب هما دول ياجماعة اهل الاعرف حيحصلهم ايه فى الاخرة اهل الاعراف انا عايز اكلمكم فى اللى حيحصلهم فى حاجتين الحاجة الاولانية انى انا اقولك النوعية دى حيحصلها ايه فى الاخرة اللى كان عندها عادى تطيع شوية وتعصى شوية اللى التزم بس لسه فى شوية معاصى فى حياتة مضيعة دينه
اللى عمل حسنات كتيرة بس فى كبائر عمالها تعادل الحسنات اللى عمالها دول فى الاخرة حيكونوا فين انا عايز انابهكم اللى فضل فى النص فى الاخر حيكون فين حيلاقى نفسه فى النص برضوا السبب الثانى اللى عايز اكلمكم عنه احوالهم فى الاخرة انى انا اقولك مش حتقدر تغمض عنيك اللى مقدرش يغمض عنيه فى الدنيا مش حيقدر يغمض عنية فى الاخرة ياشباب تغميضة العين فى الدنيا فى الاخرة غالية اوىوالله العظيم غالية اوى (ولاتحسبن الله غافلا عما يعمل الظالمون انما يؤخؤهم ليوم تشخص فيه الابصار ) ربنا بيوصفهم وصف بعد وصف مش قادر تغمض عنيه زى ماكان مش قادر يغمضها فى الدنيا بس حنبدا القصة من البداية من قول الله (حتى اذا جائتنا رسلنا يتوفونهم )
الاية 37 من سورة الاعراف رسلك مين يارب سيدنا محمد وسيدنا عيسى لا دول رسل اختيارية تقبل اوترفض انما دول رسل اجبارية جين فى مهمة اجبارية حتنفذ حتتنفذ يعنى مش رسل زى سيدنا محمد وسيدنا ابراهيم لا دول رسل خاصة نازلين باسمك انت ببيناتك انت من وسط 6 مليار اللى على وجه الكرة الارضية
حتى اذ جائتهم رسلنا احنا فين دلوقتى احنا على فراش الاحتضار الراجل نايم على فراش الاحتضار اللى مقدرش يغمض عنيه فى الدنيا نايم وحوله الناس وافقين شوفوا ياجماعة اللى قلوبكم التفتت اليها عن ربنا سبحانة وتعالى دة حوار ساعة الاحتضار وهو فى سكرات الموت والارواح معلقة فى الحلاقيم وفى التراقى واللى حواليهم مش عارفين ايه اللى بيحصل ايه
فين اللى كنتم بتدعوهم من دون الله هما فين يجوا ينقذوكم؟؟؟؟؟ فين اللى جريتم وراهم؟؟؟؟؟؟ فين؟؟؟ قالوا خلوا عنا !!!!!!زى واحد اتحاصر هو واولادة فى حريق فاتصل بالمطافى عنوانكم ايه كذا كذا فضلت المطافى الطريق فالراجل بدات النار تاكل جسمة المطافى خلت عنا معرفتش الطريق خلاص ضلوا عنا وشهدوا على انفسهم انهم كاذبون شهدوا على انفسهم الشهادة وانتزاع الاعتراف ساعة الاحتضار قالوا ادخلوا فى امم قد خلت من قبلكم من الجن والانس ادخوا فى النار نار ايه الراجل من 3/1 ساعة كان بيكلم ولادة وبيتكلم عن مشاريعة وبيشوف يعمل ايه بكرة وفجأة على فراش الاحتضار فجأة روحة طلعت لاقى نفسه فى النار كان نايم فى الفراش فى بيته يلاقى نفسه فى النار من الدار للنار ربنا جايب الايتين دول ورا بعض علشان انسحب فجأة قالوا( ادخلوا فى امم قدخلت من قبلكم من الجن والانس فى النار كلما ذخلت امة لعنت اختها حتى اذا دركوا فيها جميعا قالت اخرهم لاولهم ربنا هؤلاء اضلونا فاتهم عذابا ضعفا من النار )الاعراف 38
كلما دخلت امة لعنت نفسها هو انت اللى عملت فيا كدة الله يلعنك انت اللى عملت فيا الموضوع الفلانى انت اللى علمتنى شرب المخدرات انت اللى علمتنى الموضوع الفلانى انت اللى دمرت دينى وعقيدتى انت اللى اقنعتنى بالمذهب الهدام دة انت اللى خلتنى امشى فى سكه الزنا
انت انت انت

انت الله يلعنك والعياذ بالله يااخونا انتم متخيلين والنار بتحرق الاجساد بتحرق القلوب بتخلى اللعنات تطلع من القلب هما دول اللى ضحكوا علينا يارب انتم لسه مش عارفين الجاى دة لسه اضعاف من العذاب
ليه يارب؟؟؟؟؟
زى ماخليتوا الفتنة اضعاف مضاعفة على امة الاسلام فى الدنيا حيبقى العذاب عليكم اضعاف مضاعفة زى ماكان كل يوم فتنة جديدة ومصيبة جديدة وباب معصية جديد
(وقالت اولهم لاخرهم فماكان لكم علينا من فضل فذوقوا العذاب بما كنتم تكسبون)الاعراف39 انتم جاين تعملوا الشرفاء تعملوا انتم قلوبكم طاهرة واحنا وحشين ماانت كانت قلوبكم سودة زينا فذوقوا العذاب بما كنتم تكسبون شوف ربنا حيقولك (ان الذين كذبوا بايتنا واستكبروا عنها لاتفتح لهم ابواب السماء ولايدخلون الجنة حتى يلج الجمل فى سم الخياط )الاعراف40
عنها مش عليهامشمئز منها زى واحد بيبص لواحد يشمئز منه او يعرض عليه اكلة يشمئز منها استكبروا عنها ايه اللى اللحية دى ايه القذارة اللى فى الوش دى قرفان منها يشوف واحد يوم فرحها منقبة ايه اللى عماله فى نفسها دة استكبروا عنها مش قادر يستوعب الدين فى حياته ان الذين بايتنا واستكبروا عنها لهم ابواب السماء يعنى اى دعاء مقفول عنه الباب مفيش دعاء بيطلع للسماء مفيش عطاء بينزل دول عايشين دول محجبوين عن ربناازاى دول اموات تقدرى على كدة ؟ تقدر على العقوبة دى؟ولايدخلون الجنه دة مين اللى بيقول كدة دة الملك سبحانه وتعالى ربنا بيقول حتى يدخل الجمل فى ثقب الابرة دة مكان ضيق اوى على بنى ادم الموت روحهم بتخرج من خرم ابرة السماء ابواب السماء تنقفل فى وشهم ابواب الجنه اللى الباب من مكة الى الشام تغلق فى وشهم ابواب جهنم توصد عليهم كانهم فى خرم ابرة طب ليه الجمل يارب اش معنى شبهم بالجمل اللى عايز يدخل من ثقب ابرة لان ربنا خلق الجمل عنده عدسة مكبرة علشان كدة الطفل اللى عندة خمس سنين يسوق الجمل يفكرة راجل كبير فالجمل لما يبص لثقب الابرة يتهيا له انه حاجة كبيرة
حاجة تعديه زى حالتهم فى الدنيا يعمل المعصية ورا المعصية ورا المعصية يقع فى الفتنة ورا الفتنة حياته كلها معاصى ويقالون سيعفر لنا من باب ان الموضوع سهل ياعم دة الموضوع بسيط ياعم واحنا بنعمل ايه
واصبحت النجاة سهلة واصبحت النجاة كانها ثقب ابرة بيضيع نفسه وبيسد باب النجاة على نفسة وبيضيق القبر على نفسة ومايكتشف الحقيقة الا يوم القيامة عاش معتقد انه كويس لغاية مااتكشف الحقيقة انه موهوم انه قريب من ربنا ويكتشف الكارثة منظر جمل فى اوضة كلها نار وفيها فاتحة اد ثقب الابرة والنار بتلسع فى كل حته من جسمه وبيجرى بجنون علشان يدخل فى ثقب الابرة راسه تنخبط يرجع تانى راسه تنخبط ومش قادر يصدق انه ثقب ابرة عارفين يااخوانالو كان ربنا سدها خالص كانت انما عارفين ليه ثقب ابرة؟؟؟؟؟؟؟ علشان قهر الواحد يبقى شايف ثقب الابرة اخبط دماغك مش حتعدى ... مش حتعدى قهر من الملك العظيم سبحانة وتعالى وكذلك نجزى المجرمين لهم من جهنم مهاد ومن فوقهم غواش يعنى ايه!!!!! ايه المهاد دى؟؟؟؟؟المهاد دى عارفين مهد النونو الصغير ..... النونو الصغير عملله مهد صغير يقعد علية كدة ويتمرج علية كدة
ماذا تطنون؟؟؟؟؟
وان كنت مش قادر تغمض عنيك فى الدنيا حتغمض عنيك بقى على سرايرجميلة خالص سراير ممهدة جدا (لهم من جهنم مهاد) الاعراف41مهاد من تحتهم والمهد دايما بيبقى بداية الشئ يعنى كل العذاب دة ولاشئ من اللى لسه جاى والمهد دة الطفل الرضيع بيبقى نايم عليه مبيتحركش حيشل عن الحركة وهو بيعذب فى نار جهنم (لهم من جهنم مهاد )مش( لهم فى جهنم مهاد)عارف حرف من دة فرق قلب الدنيا من جهنم يعنى بيتقلب فى كل حته فيها حيتقلب على كل حتة على كل صنف من اصناف العذاب فيها
ومن فوقهم غواش تخيل يبقى فيها ايه العذاب اللى من فوق يصب من فوق رؤسهم الحميم اعوذ بالله ربنا يعافينا يارب دة نوع من انواع الغواش الحاجة التانية الصخور اللى بتلقى من شفير جهنم لتستقر فى القاع علشانت تبقى وقود لجهنم تتساقط عليهم وهى فى طريقها لجهنم الحاجة التالتة الضرب بمقامع الحديد الحاجة الرابعة لهم من فوقهم غلل من النار ومن تحتهم غلل والعياذ بالله الالاف الكيلو مترات حيطلع فين بقى ؟؟؟؟؟؟؟
دة كلام الملك يااخوانا اية كمان القيح والحميم اللى بيتساقط من اجساد اهل جهنم بيتساقط عليهم بما فيه من مرارة
نبدا نشوف الايات الجميلة الايات اللى نفسنا فيها الايات اللى بتتكلم عن الجنة النوع التانى اللى غمض عنية عن الفتن اللى اعتزل الفتن اللى كان عندة دين اللى عندة دين فى الصيف والشتاء مش اللى بيصلى الخمس فروض فى الجامعة واول ماالامتحان يخلص يطير على مارينا والساحل الشمالى مش ايام الامتحانات يتوب لربنا وبعد الامتحانات يتعرف على 50 بنت وبنت مش ايام هنا وايام هنا لايخون عندة دين مش بيصلى فى الجامع ومرتشى فى الشغل بتاعة مش بتفرج على دة وعلى دة مع ربنا ساعة طاعة وساعة ترفيه مش الترفيه الحرام (والذين امنوا وعملوا الصالحات لانكلف نفسا الا وسعها ) الاعراف42دين ربنا كان واسع دين ربنا كان براح قارن بين وسعها ومابين سم الخياط التانى مكبوت مخنوق مكتوم انام دة فى سعة( اولئك اصحاب الجنة هم فيها خالدون ونزعنا مافى صدروهم من غل )الاعراف43 لما يقابلوا بعض فى الجنة فرحانين بيقابلوا بعض بحب وسعادة ليه نضحى بكل دة ليه ؟؟؟؟؟؟؟
( ونزعنا مافى صدروهم من غل )
قارن بين دى بدى( كلما دخلت امة لعنت اختها) شوف الكراهية مابين دول وبعض وبين الحب اللى مابين دول وبعض (تجرى من تحتهم الانهار )
قارن بين دى وبين (لهم من جهنم مهاد ومن فوقهم غواش )نار من فوق و تحت( تجرى من تحتهم الانهر وقالوا الحمد لله الذى هدانا لهذا )
اول كلمة بيقولها اهل الجنة الف حمد والف شكر ليك يارب ليه؟؟؟؟؟؟؟؟
لانهم مكنوش مصدقين انهم داخلين يااخوانا انا عايز ادلك على سعادة اللى داخل الجنة اول قدم بتوضع فى الجنة انا نفسى انقلها لك عارف لو طالب دخل الامتحان ومعرفش يجاوب حاجة وخرج ساقط ساقط ورايح مكسور بيبص لاقها ناجح الف شكر ليك يارب بلاش حجبلك حجاة اشد
انت عارف واحد فجاءة طلعله فى صدرة او وحدة طالعلها ورم فى صدرها بدا يكبر فبدا يخاف ويترعب راح للدكتور قالة لادة الموضوع خطير جدا دة ممكن يكون ورم خبيث تروح تعملى حالا اشاعة مقطعية تخيل الراجل دة داخل على رجلية رجل مسندينة نام وهو بيرتعش الدكتور قاله استنى النتيجة قاعد يدعى ويقول يارب يارب
فجاءة طلع الدكتور ومعاه التقرير بصله وعنية متعلقة كانه حيتحكم عليه بالاعدام خلاص مش قادر يغمض عنية
خير يا دكتور مبروك طلعت سليم يعمل ايه الف حمد والف شكر ليك يارب
اهى دى وقالوا الحمدلله

نرجع للموقف الرهيب اللى كنا فيه مع اهل الجنة مع اول قدم حطها فى الجنة وهما بيقولوا الف حمد والف


شكر ليك يارب فرحانين ياجماعة انا عايزكم تتخيلوا معايا واحد واخد كتابه بيمنه فانا من اهل الجنة ولا ايه مش مصدق انة هو من اهل الجنة وبعد كدة وهو بيقرب من الجنة .... الجنة قربت منه فبدأ يشوفها من برة حيتجنن هى دى الجنة ..... الجنة ياجماعة من برة مبهرة مذهلة سبحان الله عارفين يعنى ايه سيجاف الجنة؟؟؟الستائر الفخمة اوى ونجاف الجنة من الانوار التى تلآْْْلآْ والسلالم اللى زى سلالم القصور
واللى افخر من سلالم القصور منظر الجنة مبهر
صدرة المنتهى شجرة الرسول قال عنها لايستطيع احد ينعتها من شدة الحسن برة الجنة فمابالك بالشجرة اللى جوة الجنة فيقرب مشدود مبهور كل مايقرب من الجنة رائحتها تزيد الريحة الرهيبة تزيد اكتر الجميلة ثم يقف امام الجنة فبدأ ينفتح ينفتح فيذهل بالى هو شايفة ينبهر وبعد كدة ادخل
انا!!!! انا!!!!
ادخل فهو بيجرى اول رجل جوة الجنة الف حمد والف شكر ليك يارب احمدك واشكر فضلك يارب
(الحمد لله الذى هدانا لهذا وماكنا لنهتدى لولا ان هدانا الله )
واخدين بالكم يااخونايعنى اية وماكنا لنهتدى انا يارب مكنتش وش جنة انا يارب مكنش ينفع ادخل جنة انا كنت وحش قوى يارب انا عارف نفسى يارب لولا انت اللى نجدتنى يارب
زى سيدنا يوسف لما بيقول"( ماكان لنا ان نشرك بالله )يوسف38 احنا شجرة تفاح مطلعش جميز اهو دة العكس
وماكنا لنهتدى انا يارب شجرة جميز طلعت تفاح ازاى
كله برحمتك يارب
يااخونا افتكروا الكلمة دى كويس اوى احنا وحشين اوى وماكنا لنهتدى احنا مش وش هداية ولاوش جنة والله العظيم لولا ربنا مااحنا نافعين والله ياجماعة لو ربنا مانجدنا احنا حنضيع والله يااخوانى ويااخواتى منجدناش حنبقى من الهالكين يااخوانا احنا اخطاء قلوبناوذنوبنا كتير اوى والفتن الايام دى لاتحصى
لو ربنا منجدناش حنضيع لازم نعيش بالاحساس دة مالى قلوبنا وماكنا لنهتدى لولا ان هدانا الله لقد جائت رسل ربنا بالحق احنا طلعنا احنا الصح احنا طلعنا احنا الحق احنا كنا متأكدين احنا الحق لقد جائت رسل ربنا بالحق (ونودوا ان تلكم الجنة ) كل اللى شايفينوا دة بتاعكم كل الاراضى دى بتاعتكم كل القصور دى بتاعتكم كل النعيم دة ليكم انتم( تلكم الجنة أورثتموها بما كنتم تعلمون)
الصحابة عاشوا مع الاخرة ياجماعة مش زينا يااخوانا بنفتكرها كل شوية ساعات لدرجة انهم شافوها بعنيهم زى احد الصحابة لما بيقول فى صحيح مسلم (ان نكون عند رسول الله فيحدثنا عن الجنة والنار فكان راى عين )شايفنها بعنيهم سمعناها بودنهم وشموا ريحتها زى انس بن النضر فى يوم احد ان لاجد ريح الجنة هنا شمها يااخوانا ياجماعة الصحابة عاشوا معاها احنا مش عايشين ليه مش عايشين مع المواقف دى ليه هما دول حيقدروا يغمضوا عنيهم هما اهل الجنة حيقدروا يغمضوا عنيهم (تلكم الجنة اورثتموها مفيش نوم من كتر النعيم اورثتموها يعنى ايه يعنى الجنة كانت شركة بينكم وبين اللى مرمين فى جهنم دلوقتى ولكن مرضوش يدخلوا وانتم ورثتم مكانهم يعنى ايه الورث ؟ يعنى بقت ملكية ! بقت ملككم يعنى ايه الورث دة حاجة بالساهل انا متعبتش علشان اورث 100 مليون جنية
دى مش بعملكم دى برحمتى الجنة دى لو بعملكم مكنتش حصلت جمصة وراس البر انما الجنة برحمة الملك سبحانة وتعالى تلك الجنة اورثتموها بماكنتم تعملون دول بينادوا بالبشريات التانين بينادوا بامم قد خلت من قبلكم بالجن والانس فى النار والعياذ بالله يترموا فى جهنم شايفين الفرق؟؟؟؟شايفين الفرق ياجماعة تلكم الجنة واسعة انما التانين فى مكان ضيق فى جهنم
الحمد لله انا مكنتش مصدق انا حنجو يارب كانوا خايفين فى الدنيا انما التانين مطمئنين فى الدنيا اللى كانوا مطمئنين ضاعوا ودخلوا جهنم واللى كانوا خايفين ومش مصدقين انهم يورثوا الجنة هما اللى بقوا اهل الجنة
دخل اهل الجنة الجنة ودخل اهل النار الناروبدأت النداءات احنا دلوقتى من لحظة الصفراللى احنا عايزنها بنقرب من النموذج اللى احنا بنتكلم عنه بس انا بجبهلكم الاول علشان تعيشوا معايا
علشان تكتشفوا المفأجاة المذهلة اللى حنكتشفها دلوقتى!!!
ونادى اصحاب الجنة اصحاب النار بينادوا عليهم علشان بهدلوهم فى الدنيا عملوا عليهم افلام فى الدنيا عملواتمثليات وقصص عليهم فى الدنيا عملوا صحف قذرة دنسة كفرية علشان يحاربوهم بها فى الدنيا عملوا قنوات علشان يحاربو بهاالملتزمين فى الدنيا فدلوقتى بيتعذبوا ونادى اصحاب الجنة اصحاب النار ان قد وجدنا ماوعدنا ربنا حقا فهل وجدتم ماوعد ربكم حقا
لقينا النعيم حق ولقينا الحور حق ولقينا القصور حق ولقينا النظر لو جة الله حق ولقينا الموائد بتاعت الجنة حق فهل وجدتم ماوعد ربكم حقا
لقيتم الحميم حق لقيتم شفير جهنم حق لقيتم المدارك والمهاوى بتاعت السعير حق
قالوا نعم
نعم كلمة من ثلاث حروف بس مرار الدنيا كلها فيها نعم ولسه حيكملوا تنزل صاعقة على دماغهم فورا فاذن مؤذن بينهم ان لعنة الله على الظالمين يعنى ايه ؟؟؟؟؟؟
يعنى فورا انتم ملعونين اسكتوا مش انتم اهل البدع والشهوات فى الدنيا مش انتم اللى كل يوم بطلعوا بدعة وشهوة جديدة فى الدنيا خليكم بقى وبينهم حجاب
اللحظة اللى مستنينها ياجماعة من اول الحلقة (وعلى الاعراف رجال )الاعراف46على ايه ؟؟؟؟؟؟؟؟دى ايه ؟؟؟؟؟؟
جبل دة فين فى ارض المحشر؟؟؟؟؟ومين الرجالة دول اهل الاعراف؟؟؟؟
اللى هما مين ؟؟؟؟
اللى قولنا عليهم اللى حسناتهم اتعدلت مع سيئاتهم اللى حياتهم كانت فيها تطبيع مابين الطاعة والمعصية مابين عمل اهل الجنة وعمل اهل النار اللى كانوا عاملين الاتنين مع بعض عادى اللى هما مين اللى كانوا سايبين الباب موارب بينهم وبين الفتن اللى هما عملوا حسنات وعملوا كبائر بس ماتبوش منها فالكبائر ضيعتلهم الحسنات واتعدلوا فى الاخر اللى هما الدين عندهم مش دين بيبعوا دينهم فى الشتا ملتزم وفى الصيف يلا على مارينا مفيش التزام اللى بيبيع دينه بعرض من الدنيا اللى هما مين اهل الاعراف اهل الاعراف فين وافقين على الجبل فى ارض المحشر جبل ايه دة اهل الجنة دخلوا الجنة واهل النار دخلوا النار يعنى ايه ؟؟يعنى ال50 الف سنة خلصوا يعنى اهل الاعراف دول وافقين بقالهم 50 الف سنة وافقين فى ارض المحشر مش عارفين مصيرهم واهل الجنة دخلوا قدمهم الجنة واهل النار دخلوا قدامهم النار هما وافقين مش عارفين رايحين فين ياللهول يااللهى ؟؟؟؟؟؟ يعنى ايه ؟يعنى لما الصحف تطايرت اهل الجنة خدوها باليمين واهل النار خدوها بالشمال ودول واقفين ملهمش صحيفةلما عدوا من على الصراط دول عدوا ودول معدوش ليهم مكان لمادول اتنادوا من اهل الجنة ودول اتنادوا من اهل النار دول متندوش من اى مكان لما الموازين اتوزنت دول طبت كفة الحسنات ودول طبت كفة السيئات ودول ملهمش ميزان ياللهول ايه يااخوانا دة ايه الرعب الرهيب دة 50 الف سنة فى ارض المحشر وخلص يوم القيامة ودول وافقين على جبل الاعراف بيبصوا على دول وبيبصوا على دول كانوا مين دول علشان نتقيهم اصلوا دول اتعرضوا لعذاب رهيب دول كانوا مين ؟؟؟؟
اول جملة بتقولك دول كانوا مين ؟؟؟؟
(وعلى الاعراف رجال يعرفون كلابسيماهم )
عارفين دول وعارفين دول عارفين العالم فلان والداعية فلان والشيخ فلان وعارفين المغنى فلان والممثل فلان والقواد فلان عارفين الصاحب الفاسد وعارفين الصاحب الصالح فلان عارفين دول وعارفين دول ماشين مع دول وماشين مع دول كانوا ماشين مع اهل الصلاح ومع اهل الباطل فى الدنيا لم يحسموا حياتهم مكنتش حد فاصل مع الله كانوا ماشين مع دول شوية ومع دول فجم فى الاخر لا لقوا نفسهم مع دول ولا دول
مش حتقدر تغمض عنيك
(واذا صرفت ابصارهم تلقاء اصحاب النا)رالاعراف47
مش حتقدروا تغمضوا عنيكم ياللى مقدرتوش تغمضوا عنيكم فى الدنيا مش بقولكم مش حتقدر تغمض عنيك تغميضة العين يوم القيامة غالية اوى زى مثلا صدام بيعذب بحاجة اسمها عدم النوم يعنى ممنوع ينام 50 الف سنة مش حتقدر تغمض عنيك
يعرفون كلا بسيماهم مينفعش يااختى يبقى ليكى الصاحبة الملتزمة والصاحبة اللى ليها 50 صاحب مينفعش مينقعش ياولدتى تكونى بتتفرجى على القناة دى والقناة دىماينفعش ياولدى تكون بتصلى الفجر فى الجامع وفرح بنتك بالمنظر دة ماينفعش ماينفعش
تبقى ملتزم فى فترة وفترة ماينفعش ماينفعش تبقى تكون الطاعة جنب المعصية فى حياتنا مينفعش ياجماعة عايزين يبقى الدين دين مراد ربنا واضح وصريح يعرفون بسيماهم طب ليه مش بشكلهم دة انت لو دخلت على صاحبك مريض مش حتعرفك شكل ايه فمابالك واحد اتعذب فى نار جهنم ملامحة اتشوهت ميتعرفش الا بسماهم انما اهل الجنة دة انت لما تشوف واحد يوم فرحه بتقوله انا معرفتكش تخيل واحد فواعلى غلبان بياخد فاسه الصبح بيدور على واحد يشغله ب20-30 جنية
فى اليوم حيبقى يوم القيامة ملك لو كان من اهل الطاعة خدم وصولجان وحشم ونعيم ياكل ويشرب من نعيم اهل الجنة لما تشوفة حتعرفة من سيمات علامات تعرفة انه ده فلان بتاع الدنيا
(وعلى الاعراف رجال) قلبهم حيتخلع ربنا حط قدامك شاشة لاهل الجنة وشاشة لاهل النار وحطك فى النص على جبل الاعرافاتفرج من دلوقتى حدد من دلوقتى علشان ماتقفش الوقفة دى من دلوقتى وقفة رهيبة شوف ربنا سبحانة وتعالى بيقول ايه( ونادوا اصحاب الجنة ان سلم عليكم) احنا يااخوانا كنا معاكم فى الدنيا متنسوناش اشفعوا لينا يااهل الجنة ..... يافلان سلام عليكم (لم يدخلوها وهم يطمعون)
(واذا صرفت ابصارهم تلقاء اصحاب النار )
وفجاءة وهما بيتكلموا سمعوا صوت رهيب يلتفتوا كلهم كل فى نفس واحد وربنا بيقول تلقاء يعنى ايه يعنى تلاقائية مفيش تحكم فى الجوارح واذا صرفت يعنى غصب عنه زى ماكان فى الدنيا عنيه هنا وهنا فى الاخرة حتكون عنيهم هنا وهنا عنيهم مع الدين شوية ومع فتن الدنيا شوية فى الاخرة برضوا عنيهم مش مركزة زى اللى حصل فى الدنيا( واذا صرفت ابصارهم تلقاء اصحاب النار ) اية اللى بيحصل دة عذاب جديد مشهد جديد ( قالوا ربنا لاتجعلنا مع القوم الظالمين) منقدرش نستحمل يارب (ونادى اصحاب الاعراف)
يانهار ابيض!!!!!!!!!!!!!!! شايف اللى بيتعذب دة!!!!!!!!!!
يخرب بيتك ماهو اتخرب خلاص هو لسه حيتخرب هو فى خراب بعد كدة انت اللى كانوا بيتصارعوا على حفلالتك وتشلهم عربيات الاسعاف
(واذا صرفت ابصارهم تلقاء اصحاب النار قالوا ربنا لاتجعلنا مع القوم الظالمين )
( ونادى اصحاب الاعراف رجالا يعرفونهم بسيماهم ) اتشوهوا من كتر العذاب (قالوا مااغنى عنكم جمعكم وماكنتم تستكبرون)
تعالوا شوفوا اللى كنتم بتستهزوا عليهم فى الافلام بقوا ايه اللى كنتم بتعملوا عليهم صفحات فى الجرايد بقوا ايه تعالوا شوفوا الملتزمين راحوا فين تعالوا شوفوا الملتزمات العفيفات راحوا فين تعالوا شوفوا الملك بقوا فية (أهؤلاء الذين اقسمتم لاينالهم الله برحمة)هنا ربنا يصدرعفوة وكرمه على اهل الاعراف ادخلوا الجنة وبعدين يااخوانا المشهد اللى بعد كدة يضحك ويبكى (ونادى اصحاب النار اصحاب الجنة ان افيضوا علينا من الماء او ممارزقكم الله )انتم بقوا عندكم امل ليه بعد ماتلعنتم لما شافوا اهل الاعراف اترفع عنهم فى الاخرة بقوا عندهم امل انهم يقوموا تانى مش كنا مع بعض بس فى واحد ذلت رجلية زيادة فترمى هنا وواحد ربنا سترها معاه على الحد متعرفش رجلك حتجرك فين متعرفيش
مش حتقدر تغمض عنيك
هى دى خلاصة الحلقة هو شعار حلقة الليلة
مش حتقدر انت.................. مش حتقدرى انتى اللى عايز تاخد السكتين انسى اللى عايز يحضر الدرس الفلانى ويجى يقعد على القهوة ينسى اللى عايز يتفرج على القناتين اللى عايز يسمع الشريطين اللى يمشى مع النوعين ينسى
مينفعش.........مينفعش.....
مش حتقدر تغمض عنيك
حتبيع دينك فى الاخر
طب اعمل ايه الحل ايه ؟؟؟؟؟
عارف الراجل اللى كان مع الاتنين واتقفلت عليهم الصرخة وكانوا حيموتوا وقاعدوا يتقربوا بعمل صالح عارف التانى اللى قال ان لى ابنة عم احبهابحبها يارب كاشد مايحب الرجال النساء فرودتها عن نفسها فامتنعت اصابتها حجاة مادية لفت على الكل ملقتش محدش عطاها حاجة فجتلى لغاية عندى قالتلى انا محتاجة فرودتها عن نفسها سلمينى نفسك اديكى الفلوس عايز ة كام 100 دينا موافقة ........ موافقة خلاص فقالت اتقى الله فقمت من عليها ياجماعة ربنا حرك الصخرة لانه عمل بطولة نادرة من البشر انه يقدر يعملها انت بتقولنا القصة دى ليه؟؟؟؟؟؟؟؟؟؟؟؟؟؟
علشان الروشتة الرهيبة اللى الراجل اخدها اتقى الله انا عايزك وانت نازل المواصلات الصبح اتقى الله ... انا عايزك وانت نازل الجامعة الصبح اتقى الله ... انا عايزك وانت نازل الشعل الصبح اتقى الله ... انا عايزك وانتى نا زلة وانتى بتعملى النقاب او الاسدال او الخمار او الحجاب بتاعك اتقى الله انا عايز نجيب ميكرفون ونحطة فى ودننا وصدورنا ونمشى فى الشارع اتقى الله
علشان تتعالج انا عايزك تفتكر نصيحة النبى (لاتفتح فانك ان تفتح تلج )محدش كبير على الفتن كل الملتزمين اللى ضاعوا وكل اللى التزم وانتكس وكل اللى ما التزموش كل دة كانوا بيشوفوا الاعلانات فى الشوارع كانوا بيبصوا على الفتيات اللى ماشية بصوا على الجرايد بصوا على الابراج والشباب بص على المواقع فى الانترنت مقدرش
لازم نقدر ياشاب طب انا مش قادر اصبر مش قادر اصبر ادينى حل عملى اديك حل عملى؟؟؟؟؟؟؟؟؟؟ يعنى اعمل ايه !!!!!!!!!!
متقوليش اصبر يعنى انت جيلى الساعة 2 الظهر فى رمضان تقولى انا حموت من العطش اصبر فى حيطة جميلة الواحد يخبط راسة تنزل دم يروح المستشفى عقبال مايخيطوة يكون المغرب اذن خلاص يدخل ويفطر
يعنى ايه حل عملى ؟؟؟؟؟؟؟؟ حل عملى ان احنا نصبر فى عصر الفتن اللى احنا عايشين فية عارفين مين هما اهل الاعراف ؟؟؟؟؟؟؟؟ اللى هما حسناتهم اتعدلت مع سيئاتهم لية ؟؟؟؟؟ عارفين اهل الاعراف بمفهومنا هم مين ؟؟؟؟؟؟؟؟
هم ساعة وساعة ساعة طاعة وساعة معصية اللى عملوا سيئات بس عملوا كبائر اللى سابوا الباب موارب بينهم وبين الفتن اللى فى حياتهم تطبيع بين عمل اهل الجنة واهل النار
دول يااخونا للاسف الشديد اللى عندهم تميع فى الدين اللى عندة دين عندة دين فى كل حاجة عندة دين فى قنوات الدش اللى عندة عندة دين فى نوعية اصحابة وصاحبتها عندة دين فى اخلاقة ومعاملاتة عندة دين مع امه وابوة مع مراتة ومع اولادة مع جيرانة ومع الناس كلها عندة دين لما يتعرض عليه المعصية فى السر عندة دين لما يتقفل علية اوضة ومحدش شايفة بيعمل اية
عندها دين لما واحد يعاكسها عندها دين لما تنزل فى ساحة الجامعة
اللى عندة دين عندة دين حتى لو هو مريض لو محتاج للجنية وهو مريض وفى الصيف ولما تعرض علية الرحلة
انما السكة التانية سكة اللى يروح ميرجعش اللى مش حيغمض عنية ضايع ضايع
النصيحة دى نصيحتى ليكم الليلة ونصيحة اهل الباطل ليكم شعارهم ونصيحة محمد علية الصلاة والسلام من 1400 سنة ليكم ونصيحة ربنا فى كتابة ليكم لاتفتح اعتزل الفتنة الا فى الدعوة الى الله لاتفتح فانك ان تفتح تلج انتهت حلقة الليلة اتمنى الرسالة وصلت اتمنى تكون اتفهمت اللى حيفهمها حيعيش مستريح ياجماعة فى اتنين معذبين واتنين مستريحين ال 2
المعذبين الملتزم اللى فى قلبة دنيا مش متهنى على الالتزام حيموت على المعصية والتانى الفاتن الى فى قلبة خوف من الله مش متهنى على المعصية
والاتنين اللى مستريحين العاصى اللى مفيش فى قلبة خير خلاص كلب شيطان والعياذ بالله والطائع اللى مفيش فى قلبة سوء انا عايزك تكون دة انا عايزك تبقى كدة عايزين نستريح ياجماعة عايزين نريح قلوبنا من العذاب الرهيب اللى فى عصر الفتن شعار الشهوات طفوا الحريق طفى حريق الشهوات اللى فى قلبك............ واللى فى قلبك طفوها بالمطافى الايمانية تلاوة القرءان وقيام الليل والصحبة الصالحة ودروس الجامع والدين وبيئة الايمان يااخوانا انما الاتنين مينفعش شوية اولع فى قلبى وشوية شوية اولع فى قلبى وشوية اطفى مينفعش حنموت فى الاخر حنهار فى الاخر يااخوانا كفاية تطبيع مابين الطاعة والمعصية
لا للتطبيع
مابين الطاعة والمعصية
لازم ناخد حد فاصل ونختار ياهنا ياهنا انما اللى فى النص جم لا لقوا نفسهم هنا ولا لقوا نفسهم هنا
وجزاكم الله خيرا

تفريغ الأخت حجابي تاجي


للتحميل








مع خالص الود

   طباعة 
0 صوت
التعليقات
روابط ذات صلة
روابط ذات صلة

المواد المتشابهة المادة التالية
جديد المواد
جديد المواد
تفريغ درس " ماذا لو تكلم الكفن" - تفريغ دروس منوعه للشيخ **حازم شومان**
عايز بس مش قادر ...... الجزء الاول ؟!! - تفريغ دروس منوعه للشيخ **حازم شومان**
الافتقار إلى الله لد/شومان - تفريغ دروس منوعه للشيخ **حازم شومان**
الثقة في الله - الدرس وتفريغه د/ شومان - تفريغ دروس منوعه للشيخ **حازم شومان**
القائمة الرئيسية
تلاوات تعليمية واحكام التجويد بالصوت والصورة


هل أعجبك هذا المحتوى ؟

>>> شارك الموقع مع أصدقاء على الفايسبوك والدال على الخير كفاعله <<<
facebook share islamic

إضغط هنا للمشاركة


هل أعجبك هذا المحتوى ؟

اسطوانات وزارة التربية والتعليم وتطبيقات للموبايل
Powered by: MktbaGold 6.6