جديد الموقع اسطوانات وزارة التربية والتعليم وتطبيقات للموبايل

تفريغ حلقة " أقبلت يا شعبان " للشيخ حازم شومان ( 2 - 7 - 2011 )

عرض المادة
تفريغ حلقة " أقبلت يا شعبان " للشيخ حازم شومان ( 2 - 7 - 2011 )
2865 زائر
05-01-2017

أقبلت يا شعبان .... أقبلت يا شعبان

النهاردة يا أخواني ويا أخواتي في الله واحد من شعبان

الموسم العظيم اللي للأسف الشديد الكثير من الناس مش منتبه ليه ولا لقيمة الوقفة الواجبة مع ذلك الشهر العظيم

قلتلكم قبل كدا أن شعبان دا يعتبر أخطر من رمضان صحيح مش أعظم من رمضان في الأجر لكن يا أخواني رمضان اللي فات بكل عباداته وليلة القدر بتعته هترفع إلي الله في شعبان دا


يا نهارأبيض يعني أعمال سنة كاملة تعرض علي الله !!

قال رسول الله صلي الله عليه وسلم " ما من ساعة تمر بابن آدم لا يذكر الله تعالي فيها إلا حسر عليها يوم القيامة "

يعني اللي هيُرفع إلي الله سنة من عمرك يعني حوالي عشر ة ألاف ساعة

يعني كل ساعة لم نذكر الله تعالي فيها هنتحسر عليها يوم القيامة

مطلوب مننا وقفة دلوقتي علشان نصحح ذنوب سنة كاملة في الأيام القليلة القادمة

سبحان الله يا أخواني من رحمة ربنا أنه أعلمنا أن الأيام القادمة دي هي اللي هتُرفع فيها الأعمال ، كأن ربنا بيقولنا اقف مع نفسك بقي في الفترة دي
صحح خط سيرك ومسارك في الفترة دي
شعبان هو بوابة رمضان .. يعني عايزين رمضان جديد يبقي لازم شعبان جديد
كل حاجة عملناها طول السنة اللي فاتت دي هتُرفع إلي الله كل اللي صلي واللي صام واللي حج واللي اعتمر
كل نظرة نظرناها وكل حاجة سمعناها وخطوة خطوة مشيناها

طيب يوم إييييييييه في شعبان ؟؟؟؟

محدش يعرف نهائيا أنهي يوم بالضبط في شعبان علشان نفضل مستعدين طول ذلك الشهر


تخيل أن أصحاب كل شركة بييجوا في شهر في السنة يعملوا الموازنة بتاعتهم علشان يشوفوا كسبوا إيه وخسروا إيه


وإحنا بالضبط كدا يا أخواني الموازنة السنوية بتاعت أعمالنا بتتعمل


الأعمال بالخواتيم .. يا سلام لو ختمنا السنة باحسن أعمال نتقرب بيها إلي الله





يعني إيييييه أعمالي ترفع إلي الله ؟؟؟؟؟؟؟

يا أخواني دي زي آخطر مرحلة يوم القيامة ، العرض علي الله


قال تعالي " يَوْمَ تُبْلَى السَّرَائِرُ " يعني كل اللي جوة قبلك هيتكشف أمام الله سبحانه وتعالي وهو طبعا مكشوف من قبل ومن بعد


الحاجة التانية الصحيفة هتعرض علي الله

أمال ايه العرض اللي في شعبان دا ؟؟

هو هو زي اللي هيحصل يوم القيامة هيحصل معاك في شعبان


إذا كانت ليلة النصف من شعبان اطّلع الله علي أهل الأرض فيغفر للمؤمنين ويملي للكافرين ويدع أهل الحقد بحقدهم

يعني الاطلاع دا اطلاع قلبي ، يعني شعبان فيه اطلاع علي ما في القلوب زي يوم القيامة









طب والحاجة التانية هي رفع الصحيفة إلي الله

ياااااااااااا الله

يعني شعبان نموذج مصغر للعرض علي الله ، عرض حي لمشهد من مشاهد يوم القيامة

يعني إحنا المفروض نتعامل مع شعبان وكأنه عرض علي الله


قال تعالي " وَإِذَا الْوُحُوشُ حُشِرَتْ "طب والوحوش دي يارب مش هتنهشنا يوم القيامة وهي واقفة معانا ؟؟؟؟ لا


لأن الوحوش دي مفزوعة من الحساب ، طب وإذا كانت أصلا ماليهاش صحيفة وحالها كدا


أمااااااااااااال اللي له صحيفة يعمل إيه ؟؟ قلبه يوجل قد إيه ؟؟


يعني شعبان دا موسم الوجل القلبي لأنك هتعرض علي الله


يا أخواني أنتوا جاهزيييييييييين ؟؟ تقابلوا ربنا كدا !


وااااااااااخجلاه .... وااااااااااااحياءاه


يعني شعبان دا شهر بعده إما هتقول " هَاؤُمُ اقْرَأوا كِتَابِيَهْ " وإما هتقول " يَا لَيْتَنِي لَمْ أُوتَ كِتَابِيَهْ "


يعني شعبان من شهور الفصل في حياة الإنسان









النبي صلي الله عليه وسلم وهو النبي كان بيستعد لرفع الأعمال قال" وأحب أن يرفع عملي وأنا صائم "دا بالنسبة للنبي


أمال أنت ... وأنتي ... هتعملوا إييييييه ؟؟


الصحابة رضوان الله عليهم كان كل واحد فيهم كل معني من معاني الآخرة مغير له حياته ، يعني كل واحد كان له معني عايش معاه








سيدنا عبد الله بن جحش ييجي قبل غزو أحد ويقول " اللهم ارزقني اليوم رجلا كافرا شجاعا صنديدا يقتلني يبقر بطني يجذع أنفي يقطع أذني "


لييييييييييه كل دا ؟

قال " فألقاك يارب ، فتقول عبدي لما فُعل بك هذا فأقول فيك يارب "

شايفين المعني اللي غير حياته " القاك يارب " يعني العرض علي الله ، مستني اللحظة اللي هيقول فيها : فيك يارب







أبو طلحة لما دخل علي زوجته أم سُليم ووضع رأسه علي رجلها وأخذ يبكي يبكي ، سألته بتبكي ليه قالها تذكرت قول الله " وَإِنْ مِنْكُمْ إِلا وَارِدُهَا كَانَ عَلَى رَبِّكَ حَتْماً مَقْضِيّاً " اللي هو العبور علي الصراط وجهنم تحته ، فذكر الله أنا واردون ولم يذكر أنا صادرون


هو دا المعني اللي غير حياته عبور الصراط







عثمان بن عفان رضي الله عنه كان لما يشوف قبر يقعد يبكي يبكي ، وكان يقول " إن أمرا هذا أوله لحري بأن يُستعد له ، وأن أمرا هذا آخره لحري بأن يُزهد فيه "

يقصد بالأولي الآخرة اللي أولها القبر ، ويقصد بالتانية الدنيا اللي ماليهاش قيمة وآخرها القبر







دي أهمية المعاني اللي نعيش عليها وتغير حياتنا


وأحنا دلوقتي في معني العرض علي الله ، ياتري المعني دا ممكن يغير حياتنا ؟؟ ياتري هيأثر فينا قد إيه ؟؟









سيدنا عمر بن الخطاب كان ماشي في السوق ووجد رجل يقرأ " يَوْمَ يَقُومُ النَّاسُ لِرَبِّ الْعَالَمِينَ" فمرض شهرا... عاااااش مع هذا المعني مع العرض علي الله والوقوف بين يدي الله سبحانه وتعالي


" وَالَّذِينَ يُؤْتُونَ مَا آتَوْا وَقُلُوبُهُمْ وَجِلَةٌ أَنَّهُمْ إِلَى رَبِّهِمْ رَاجِعُونَ "قبله مرجوف ، يدعو ويصلي ويصوم و برده خااااايف


أخشي من العرض الرهيب عليك ياربي وأخشي منك إذ ألقاك


يارب جئتك نادما أبكي علي ما قدمته يداي لا أتباكي


العرض علي الله دا أخطر من سؤال منكر ونكير ، وأخطر من تنزل الملايكة عند الموت ، لأن دول مخلوقين
لكن العرض علي رب العاااااالمين



الملائكة اللي ملهاش صحف بتقول يوم القيامة يارب سلم سلم


أمال إحنا هنقول إيييييييه ؟؟!!








النقطة التاني

بقي عرض أعمال سنة علي الله


أنت متخيل يعني إيه السنة اللي فاتت دي بكل أعمالها هتعرض علي الله ..



دي صحيفة هتصعد إلي الله وهتتقفل ومش هتتفتح تاني إلا يوم القيامة ، ومااااااااابالك باللي فيها بقي



الحق توووووووووووب قبل ما تتقفل الصحيفة


تخيل أنك هتتسأل عن كام كلمة قلتها كام غيبة كام نميمة كام كذبة كام فحش من القول كام وكام


دا في حديث النبي صلي الله عليه وسلم استغفر ربنا فيه من 13 نوع من أنواع السيئات



طيب ما كان قال يارب اغفرلي ذنوبي وخلاص


لالالا

لأن كل نوع من الذنوب له عقوبة من العقوبات


فلازم تتوب من كل ذنب لوحده

ولازم تقف قدام الذنوب دي كلها وتراجع نفسك







قال النبي صلي الله عليه وسلم " اللهم اغفر لي خطيئتي ، وجهلي ، وإسرافي في أمري ، وما أنت أعلم به مني ، اللهم اغفر لي جدي وهزلي وخطئي وعمدي وكل ذلك عندي ، اللهم اغفر لي ما قدمت وما أخرت ، وما أسررت وما أعلنت ، وما أنت أعلم به مني ، أنت المقدم وأنت المؤخر ، وأنت علي كل شيء قدير "

إيه الفرق بين الخطيئة والجهل

أن الخطيئة دا واحد بيعمل الذنب وعارف أنه حرام وعارف حكمه ، إنما الجهل دا واحد مش عارف


أمال يعني إيه إسرافي في أمري ؟ دا واحد كل يوم يعمل ذنب معين ومش عارف يسيبه ، يعني الذنوب المستديمة بقي


وما أنت أعلم به مني


معاصي القلوب بقي ، لأني ممكن أعرف جوارحي عملت إيه النهاردة ، إنما قلبي ما أقدرش أعرف إيه الأمراض اللي فيه الرياء والغرور والعجب


جدي وهزلي

يعني اللسان بقي ، الكلام سواء كان متعمد أو يقول كلام مش بيحاسب نفسه عليه

وكل ذلك عندي

أنا معترف يارب بكل دا ، انا يارب صاحب كل الذنوب دي ، كل الذنوب دي فيا

ما قدمت وما أخرت
الماااضي اللي ماعدش حد فاكره ، في فرق بين أنك تركت وبين أنك تبت ، الذنوب اللي فاتت دي لازم لها توبة

وما أسررت وما أعلنت

يعني معاصي السر اللي لم يطلع عليها إلا الله ، ومعاصي العلن اللي جاهرت بيها قدام الخلق

وما أنت أعلم به مني

يعني تأكيد علي قضية القلوب لأن دي قضية خطيرة

أنت المقدم وأنت المؤخر

يعني يارب قدمني ، يارب توب عليا ، وما تأخرنيش بسبب ذنوبي

وأنت علي كل شيء قدير


أنت اللي قادر تصلحني يارب










طاب ما تيجي نختم الصحيفة دي صح ، بخاتمة صح ، قال النبي صلي الله عليه وسلم " طوبي لمن وُجد في صحيفته استغفارا كثيرا " طاب ما نلحق الشهر دا نملاها استغفار ويكون لنا طوبي في الجنة بإذن الله سبحانه وتعالي

يعني الفترة دي أنت المفروض تفكر إيه أرجي عمل هيترفع في الصحيفة دي

أنا دلوقتي بسألك الصحيفة اللي هتطلع دي خلال أيام مش فيها ذنوب وآثام وتقصير

طب إيه أرجي عمل في الصحيفة دي تقدر تقول يارب اغفرلي ما في الصحيفة بسببه

يعني حاول في الفترة دي تعمل عمل كبير تختم بيه الصحيفة دي

حاسب نفسك بقي قبل أن تُحاسب

خلي بالك أن دي ممكن تكون آخر صحيفة لك في حياتك

فاهمين المعني ، يعني ختام الصحيفة دي ممكن يكون ختام حياتك كلها

طب ياتري عايز تختم حياتك بإيه

تخيل أن في عباد ربنا بيباهي بصحفهم الملائكة

تفتكر أنت منهم ؟؟ تفتكري أنتي منهم ؟؟

يا تري فينا حد ممكن ربنا يبااااااهي بيه الملائكة

لو رفعت الصحيفة وكنت من المقبولين

يبقي هتيجي في رمضان بقي تلاقي نفحات متنزلة ، وهتلاقي تغلُب علي النفس والشيطان









فكر في صحيفتك


صحيفتك هتروح فين وسط صحف الصوامين والقوامين والذكَّارين والمجتهدين والدعاة

لازم تفكر كدا ، تفكر الصحيفة هترفعك عند ربنا ولا هتنزلك ، هترجح كفة الحسنات ولا كفة السيئات ، هتكون فرح ولا مشكلة وأزمة

هي دي الأيام اللي ينطبق عليها قول الله
" وَسَارِعُوا إِلَى مَغْفِرَةٍ مِنْ رَبِّكُمْ "

لازم الأيام دي بقي نجيب آخرنا ، دا الحصان لما بيوصل لآخر السباق بيجيب آخره

لازم يكون حالك زي الآية دي
" إِنَّهُمْ كَانُوا يُسَارِعُونَ فِي الْخَيْرَاتِ "

قال تعالي
" اتْلُ مَا أُوحِيَ إِلَيْكَ مِنَ الْكِتَابِ وَأَقِمِ الصَّلاةَ إِنَّ الصَّلاةَ تَنْهَى عَنِ الْفَحْشَاءِ وَالْمُنْكَرِ وَلَذِكْرُ اللَّهِ أَكْبَرُ وَاللَّهُ يَعْلَمُ مَا تَصْنَعُونَ "
يعني اقرأ القرءان وصلي وما تبطلش ذكر لله

والله يعلم ما تصنعون ، طاب يارب إيه دخل لفظ الصناعة في العبادة ؟؟


علشان عبادة المخلصين دول دي صناعة للأمة وصناعة للحياة

عايزين نخلي شعارنا في شعبان يارب أتينا طائعين

أتينا وكلنا عزم علي الطاعة





يا أخواني اليقظة في وسط غفلة الجميع بيكون لها أضعاف أضعاف الثواب

زي ماقال النبي صلي الله عليه وسلم " ذاك شهر يغفل الناس عنه بين رجب ورمضان وهو شهر ترفع فيه الأعمال إلي الله "

زي بالضبط ما ربنا جعل كل الفتح والعطايا في الثلث الأخير من الليل اللي فيه الكل نايم فاللي يستيقظ في الوقت دا يبقي له أضعاف الثواب

وقال النبي صلي الله عليه وسلم " العبادة في الهرج كهجرة إليَّ "








صــفـقــــات شـــعبان .. استحضر المعاني دي


1 – عرض أعمال السنة كلها علي الله

2 – ليلة النصف من شعبان ومش شرط أن هي اللي مختصة برفع الأعمال


رفع الأعمال في أي وقت من شعبان

لكن ليلة النصف دي موسم عبادة وبعض السلف سماها ليلة البراءة يعني اللي بتعتق فيها الرقاب

كما قال النبي صلي الله عليه وسلم " إذا كان ليلة النصف من شعبان اطلع الله علي أهل الأرض فيغفر للمؤمنين ويملي للكافرين ويدع أهل الحقد لحقدهم " وفي رواية " يغفر لأهل الأرض جميعا إلا لمشرك أو مشاحن "

من رحمة ربنا سبحانه وتعالي يعمل لنا موسم تنقية قبل رمضان وإلا ذنوبنا دي هندخل بيها رمضان إزاي ؟؟؟






وفي النهاية بوصيكم بدعاء النبي صلي الله عليه وسلم لعلنا نحفظه وندعي بيه ونختم بيه صحائفنا بإذن الله

اللهم اغفر لي خطيئتي ، وجهلي ، وإسرافي في أمري ، وما أنت أعلم به مني ،
اللهم اغفر لي جدي وهزلي وخطئي وعمدي وكل ذلك عندي ،
اللهم اغفر لي ما قدمت وما أخرت ، وما أسررت وما أعلنت ،
وما أنت أعلم به مني ، أنت المقدم وأنت المؤخر ،
وأنت علي كل شيء قدير


نسأل الله أن يعيننا علي ذكره وشكره وحسن عبادته

   طباعة 
0 صوت
التعليقات
جديد المواد
جديد المواد
مش حتقدر تغمض عنيك - تفريغ دروس منوعه للشيخ **حازم شومان**
تفريغ درس " ماذا لو تكلم الكفن" - تفريغ دروس منوعه للشيخ **حازم شومان**
عايز بس مش قادر ...... الجزء الاول ؟!! - تفريغ دروس منوعه للشيخ **حازم شومان**
الافتقار إلى الله لد/شومان - تفريغ دروس منوعه للشيخ **حازم شومان**
القائمة الرئيسية
تلاوات تعليمية واحكام التجويد بالصوت والصورة


هل أعجبك هذا المحتوى ؟

>>> شارك الموقع مع أصدقاء على الفايسبوك والدال على الخير كفاعله <<<
facebook share islamic

إضغط هنا للمشاركة


هل أعجبك هذا المحتوى ؟

اسطوانات وزارة التربية والتعليم وتطبيقات للموبايل
Powered by: MktbaGold 6.6