جديد الموقع اسطوانات وزارة التربية والتعليم وتطبيقات للموبايل

تفريغ حلقة "ينتظركم أيام رائعة " من برنامج "على فين ياشباب" للدكتور// حازم شومان

عرض المادة
تفريغ حلقة "ينتظركم أيام رائعة " من برنامج "على فين ياشباب" للدكتور// حازم شومان
4129 زائر
05-01-2017

تفريغ حلقة
"ينتظركم أيام رائعة "
من برنامج "على فين ياشباب"
للدكتور// حازم شومان


.الحمد لله وكفى وصلاة وسلاما على عباده الذين اصطفى .اللهم لك الحمد كله ولك الملك كله وبيدك الخير كله وإليك يُرجع الأمر كله .اللهم صلى على عبدك ونبيك وحبيبك محمد صلى الله عليه وسلم ثم أما بعد :


كلمة سمعتها ولم أنسها أبدا منذ أن سمعتها .كان فيه حوار مع لاعب اسمه روماريو وكان عنده 35 سنة وكان سيعتزل مثل خيل الحكومة.. خلاص.. وكان فيه لاعب برازيلى جديد وكان مشهورا جدا عالميا وقتها اسمه رونالدوا وكان عنده 17 سنة فدار حوار مع روماريو أثناء توديعه الملاعب فقالوا له : ما رأيك فى رونالدوا ؟ فقال كلمة لا تُنسى .قال ينتظره أيام رائعة فقلت يااااااااااه أنظر إلى أهل الدنيا حسيت أن واحد يُسحب منه شىء غالى جدا عليه وواحد ثانى يأخذها وهو ينظر إليه ويقول إليه يابختك ينتظره أيام رائعة .لا والله العظيم ياجماعة .هذه الكلمة أقولها لكم ولنا نحن ..أقولها لكل واحد يريد أن يتوب.. لكل واحدة تريد ان تعرف طريق ربنا ..لكل واحد سيبدأ صفحة جديدة مع الله.. لكل واحد يريد أن ينطلق إلى الله... فأقول له ينتظركم أيام رائعة .يا كل واحد قلبك اشتاق إلى ربنا يا كل واحدة رايحة لربنا بقلبها وليس برجليها يا كل واحد نفسك تقرب من ربنا خطوة جديدة يا كل واحد قررت أن تتوب وقررتِ أن تتوبى ينتظركم أيام رائعة فالدين هو أروع أيام فى الحياة .


كان فيه أحد الأمراء زمان ماشى فوجد بيت أحد من السلف وكان البيت قديم وشكله فقر رهيب وكان هذا السلفى ذهب للحج فقال بيت من هذا فقالوا بيت فلان فقال مستغربا : فلان .هل هذا هو بيت فلان ؟ فالبيت كان فى حالة فقر رهيبة وكانوا جعانين وفى حالة صعبة جدا فمسك كيس دنانير ذهب وألقاها فيه فالبطبع أهل البيت من الزوجة والأولاد كادوا أن يُجنوا من الفرح فقد اغتنوا فى لحظة وربنا فرجها علينا فى لحظة إلا بنت صغيرة أخذت جنب وبكت فقالت لها أمها يابنية لما تبكى فربنا فرجها علينا فقالت ياأمى هذه نظرة نظرها لنا عبد فكيف لو نظر لنا الله. ياشباب كيف لو نظر لما الله .ياأمة محمد كيف لو نظر لنا الله. طب لو نظر إلينا ربنا ووجدنا أمام التلفاز وأمام النوادى .لو ربنا نظر لنا ونحن نعصاه فماذا سيحدث ؟

ولو نظر إليكِ فوجدك تبكين فى الثلث الأخير من الليل

ولو نظر إليك فوجدك ماسك المصحف وتقرأ وترتل وتبكى .

لو ربنا نظر إليكِ ووجدك واقفة فى صلاة الترايح تبكى من كثرة الخشوع .لو ربنا نظر إلينا ووجدنا عايشين حياتنا فى طاعة ربنا .كيف لو نظر لنا الله .أيام الدين الأيام الحلوة الأيام الجميلة الأيام التى لا تُنسى .

.كان الجًنيد يقول " واها ياأيام البدأ واها ياأيام البدأ" أيام البداية أيام الإنطلاق إلى الله .الأيام التى بها ذكريات لا يستطيع أن ينساها أحد أبدا الأيام الجميلة التى إن عاشها أحد لا يمكن ينساها أبدا . واحدة لبست نقاب فقالت كلمة جميلة جدا قالت " أنا حاسة إنى عروسة الدنيا كلهاهاتزفنى "

فأنا أريدك عروسة الدنيا كلها تزفك .هدف السلسلة دى إنك تكونى عروسة الدنيا كلها تزفك من السعادة اللى انتى فيها .

إبراهيم بن أدهم كان مرة مع إخوان له على شط نهر فوضع رجليه فى الماء وهو فرحان جدا فعيشة الملتزمين دنيا لا يستطيع أحد أن يصفها من السعادة وقال " إنا لنجد لذة لو يعلمها أبناء الملوك لجالدونا عليها بالسيوف " فأنا عندما أتذكر هذه الكلام فى مكان خلوى مع بعض الإخوة فقلت لهم والله العظيم إنا لنجد لذة لو يعلمها أبناء الملوك لجالدونا عليها بالسيوف لا أنسى أبدا مرة ركبت مع والد أحد إخوانا .أحد الشباب التائبين فقال لى لما حد بيسألنى عن تاريخ ميلاد ابنى فأقول له 25/4/2003 فأنا استغربت ابنه تخرج ما شاء الله وبيتزوج فكيف 25/4 فقال هذا تاريخ التزام ابنى .يااااااااااااااااااااه جنة والله ياجماعة .اللى بيلتزم دة بيصبحة جنة فى حياته فلو فتحت صدره ستجد جنة إنسان عايش سعيد إنسان من غير هموم إنسان ربنا كافيه كل همومه سبحانه وتعالى .

أحد الشباب كان يقول تفتكر لو أنا التزمت هاعيش سعيد ؟ يااااااااااااااااه انت هاتتذوق السعادة التى لم يذقها أحد والأيام الرائعة التى يعشها أحد .يابنى هل تعرف رحمة ربنا أدإيه؟ لو ابن ساب أبوه والأب خلاص مش عارف يجيب ابنه والإبن قاعد تايه فى الدنيا وسارح فيها وبعد كدة الأب سمع إن ابنه سُجن أو أًسر فاتقهر على ابنه وفى ليلة من الليالى وجد طرقا على الباب ووجد ابنه أمامه فماذا سيفعل الأب ومذا سيعطى له وكم سيفرح به ولله المثل الأعلى فأنت أُسرت بأسر الشهوات فلو رجعت لربنا فكم سيفرح بك الله .انتوا عارفين غنى ربنا أد إيه .ربنا يقو ل على قارون العبد الحقير " وَآَتَيْنَاهُ مِنَ الْكُنُوزِ مَا إِنَّ مَفَاتِحَهُ لَتَنُوءُ بِالْعُصْبَةِ أُولِي الْقُوَّةِ "

ياجماعة مش الاستوديو اللى أنا فيه دة استوديو كبير وواسع .لو اتملى ذهب يصبح بمليارات طب تخيل مفتاح الاستوديو حجمه أد إيه صغير جدا أد الإصبع فما بالك بخزاين قارون اللى مفاتحها لا يقدر أن يحملها الرجال وكل دة لا يمثل شىء فى خزاين الملك سبحانه وتعالى .ينتظركم أيام رائعة ياشباب لا تضيعوها .ينتظركم أيام رائعة لو عرفتوا ربنا .ياأباء ياأمهات ياأمة محمد ينتظركم أيام رائعة لو مشيتوا فى طريق ربنا .ينتظركم أيام رائعة فى الدنيا . واحد صاحبى كان عنده فى ضرسه ثقب لف بيه على الدكاترة هايموته من الوجع يقول لى " أول ما التزمت واستخدمت السواك ربنا أذهب كل دة عندى . يااااااااااااااه

واحد صاحبى بيقول لى أنا قبل ما التزم 13 تيرم رسبتهم ومفيش ولا تيرم عديت فيه نظيف .أنا ما عرفتش النجاح نظيف غير لما التزمت وتوبت إلى ربنا سبحانه وتعالى بكرم ربنا سبحانه وتعالى . شوفوا الحديث اللى فى صحيح مسلم " إن الله لا يظلم مسلما حسنة يُعطى بها فى الدنيا ويُجزى بها فى الأخرة " ولا حسنة فىالطريق دة ولا حسنة هاتضيع عليكِ فيه . .فىالطريق دة ولا خصلة شعر غطيتها هاتضيع عليكِ فيه .فىالطريق دة ولا تسبيحة ولا يوم صومته ولا ركعة صلتها ولا آية قرآن قرأتها هاتضيع عليك فيه . تًعطى بها فى الدنيا كل حاجة . أيام رائعة والله العظيم اللى عايز يعيش الدنيا كلها .اللى عايز يعيش السعادة كلها والبهجة كلها يدخل فى طريق ربنا .

كنت مرة فى أحد الدروس والواحد مشتاق .مشتاق إلى أى علامة رضا من ربنا فقعدت ادعى مع الشباب اللهم ارزقنا بشرى الدنيا والأخرة اللهم ارزقنا بشرى الدنيا والأخرة فتانى يوم لقيت مكالمة جاية لى من مكان غير متوقع تمام ولقيت واحد بيقول لى أنا شوفت لك رؤية فيها كذا وكذا فقلت سبحان الله دة احنا لسه داعيين ربنا إمبارح جربتوا إحساس إن ربنا بيحبك وإن ربنا فرحان بيكِ إن ربنا راضى عنك وإن ربنا فاتح لكِ أبوابه . ياجماعة .ينتظركم أيام رائعة .أيام جميييييييلة ينتظركم قنوات إسلامية رااائعة تخيل إنك هاتعدى أدام قناة وانتى بتتفجرى على برامج دينية جميييلة مؤثرة جدا تلاقى فى النص واحد طالع لك بجلة تيفال يقول لك " عرض مميز جدا بتمن مميز جدا لحلة مميزة جدا لها غطا مميز جدا . الحلة دى تنفع لكل حاجة ياجماعة يعنى ممكن لست البيت تطبخ فيها وومكن تبأى طربوش يلبسه راجل البيت وممكن لو عندكوا كتاكيت تملوها مية وتحموا فيها الكتاكيت . أيام رائعة وجميلة أيام ناس بتحب ربنا سبحانه وتعالى وربنا ميسر لها أمورها ومسهل لها حياتها ..ينتظركم أيام رائعة فى السعادة وفى الراحة النفسية

مرة فتاة بعتت لى جواب عن مشاعرها اتجاه ربنا .جواب جميل أوى ياجماعة بتقول فيه : وأشرق قلبى بحب الله كما أشرقت الأرض بنور ربها " قلت يااااااه على الجنة اللى الملتزمين عايشينها ياااااااااااااه

كان فيه واحدة أسلمت وكانت علامة دينها القديم مطبوعة على إيدها وعايزة تتخلص منها .فمن فرحها بالإسلام وهى مش عارفة تشيلها حرقت المكان اللى فيه الهلامة عشان تخلص من كل حاجة فيها بعد عن ربنا . الكلمة اللى مش ننساها أبدا إن فى الدنيا جنة .ياشبااااب إن فى الدنيا جنة والله العظيم إن فى الدنيا جنة من لم يدخلها لم يدخل جنة الأخرة .. لأ ياشباب .. أنا باقول غير كدة أنا باقول إن فى الدنيا جنااااااااااااات مش جنة واحدة بل جناااااااااات .

جنة طلب العلم مثلا .قابلت أحد طلبة العلم المجتهدين فبعد زواجه بإسبوع لقيته خاسس جدا قلت له يابنى الناس بتتخن بعد الزواج فقال لى من كثرة حبى للعلم ما قدرش فزوجتى كانت تنام وأنا مش قادر أعد أذاكر لغاية ما تصحى وأنام قليل جدا سبحان الله العظيم بيحبه. أحد الشباب فى جنة الدعوة إلى الله بيقول أنا أول ما التزمت كان أمنية حياتى امشى فى الشوارع أكلم الناس عن ربنا . أحد الشباب بيقولى لى أنا لا يمكن أنتكس أبدا قلت له ليه أنا خايف عليك من الانتكاس فقال لا يمكن قلت له ليه فقال " أنا كل أما أفتكر حالتى النفسية قبل الالتزام وحالتى النفسية دلوقتى أقول أنا لا يمكن أن أنتكس أبدا ...

جنة السجود ياشباب جنة اللسجود يابنات جنة السجود ياجماعة

أحد الشباب الصيادلة اللى التزموا فاصحابه عايزين يطلعوع رحلة لازم تطلع معانا فقال لهم ياجماعة ما تتعبوش نفسكوا دة أنا سجدة واحدة بس بين إيدين ربنا بكل الرحلات اللى طلعتها فى حياتى فافتكرت كلمة رسول الله صلى الله عليه وسلم فى السجود " يامقلب القلوب ثبت قلبى على دينك " ليه إشمعن فى السجود ؟ من اللى عاشه من اللى حسه .يااااارب خلى المشاعر دى ما تروحش منى يارب .افتكرت كلمة رسول الله صلى الله عليه وسلم
" يكره أن يعود فى الكفر كما يكره أن يُقذف بالنار "

مش قادر أنا بعد ما عشت المعانى دى مش ممكن أفرط فيها مش ممكن أسيبها .مش عايز أرجع يارب . يارب ثبتنى يااااااارب .أنا لو رجعت كأنى باترمى فى النار بالضبط .مش عايز أرجع يارب .

كلمة السحرة لفرعون لن نؤثرك . إيه اللى عاشوه جوة قلوبهم خلاهم يسيبوا كل حاجة وخلاهم يتحدوا كل حاجة وخلاهم يقفوا فى وجه الدنيا كلها .إيه اللى حاسوه جوة قلوبهم ياجماعة .. جنة القرآن .. أحد المفسرين له كلمة عجيبة جدا يقول " وكدت أن أعرض عن تفسير سورة الأنعام وسورة الرعد - السورتين بيتكلموا عن ربنا - لأن ما فى صدرى تجاههما وأكثر ما أستطيع أن أعبر به عنهما بينهما فجوة هائلة لايسدها شىء . أنا مش قادر أترجم اللى فى قلبى اتجاه كلامك يارب

مش قادر أترجم اللى جوايا اتجاه معانى القرآن يااااارب .مش قادر قال بس أنا هاعمل زى اللى بيشاور على نجم فهو بيشاور عليه بإيديه لكن إيديه لا يمكن تطوله أبدا

ياجماعة الدين دة جنة والسجود جنة والقيام جنة

. أحد الشباب لما التزم كان يصحى قبل الفجر بأربع ساعات يقول ياخسارة يادى الحسرة ماعتش غير أربع ساعات .من كثرة حبه للقيام . كان أحد السلف يقول " اللهم أذن لى أن أقول الليل فى قبرى " من كثرة حبه للقيام.

إوعوا تفتكروا إن الدين صعب ياجماعة فالدين دة جنات .الصيام جنة والصلاة جنة والقيام جنة والتوبة جنة ..

أحد النوادى الشهيرة فى القاهرة وخلاص ماعتش قادر . متعذب عايزة يتوب فاتصل بواحد صاحبنا قاله أنا عايز أتوب عايز أرجع فصاحبنا انشغل عنه وسابه .يقول صاحبى " أنا مرة طالع بالعربية لقيت الشاب دة بيجرى على ووجهه متغرق دموع وعامل لى بإيده كدة وقال لى مش هاتطلع ولقيته هجم على وقال لى ما تسبينيش أنا عايز أرجع لربنا أنا عايز أرجع لربنا فأخذه وفضل معاه لغاية ماراحوا يصلوا الفجر فبيقول وهو بيصلى جنبى والشاب قاعد يتهز وقاعد يتحرك لأدام وللورا فأنا مش عارف ماله .الإمام يقول التحيات ودة قاعد يتهز فعرفت أنه يرتجف.يرتجف وهو بيصلى أول صلاة بعد التوبة لربنا .مشاعر التائبين ياجماعة .مشاعر اللى راجع لربنا سبحانه وتعالى .الإلتزام جنة والله العظيم ما تتعوض إوعى تخسرها فى حياتك .إوعى تخسريها فى حياتك ..ينتظركم أيام رائعة فى الأخرة .الجنة ياشباب . الجنة دى جميلة أوى انا مش عارف الشباب إزاى ما بيموتش نفسه عشانها إزاى ياجماعة . تخيل إنى جت لك النهاردة تعالى ياحبيبى أنا عازمك النهاردة على كافيار فى الهيلتون .بكرة هاعشيك ع الساحل الشمالى حفلة شوى بعده هانروح الفيرسيزونس عازمك على شوية مشويات ماحصلتش .بعده تعالى على الميريديان هاناكل بحريات لما نشبع ياسيدى بعده تعالى بقى أفرجك على تركيا .بعده تعالى لشواطىء فلوريدا بعده فيه جزيرة فى المحيط الهادى هانتفسح فيها بعده تعالى على الساحل الشمالى فيه ..... تخيل .. المزارات السياحية فى الدنيا أصلا جننت الناس ومحدش بيلحق يتفرج عليها أمال المزارات الجميلة فى الجنة عرضها السماوات والأرض .والنهاردة بقى الحياة الإجتماعية .النهاردة مع إمراتك فى يخت كدة فى نهر الكوثر تطلعوا رحلة كدة خلوية عاطفية جميلة بكرة هاتزور النبى صلى الله عليه وسلم ومصعب وعمار وسلمان .بعده فيه قعدة مع سيدنا موسى وسيدنا إبراهيم عليهم الصلاة والسلام جميعا بعده فيه واحد صاحبك راح مع إمراته جنات عدن مارجعش فمش عايز يرجع الموضوع عجبه هناك جدا فانت هاتطلع انت وأصحابك تزوروه . رحلة أخوية حياة رائعة .ينتظركم أيام رائعة ليه تضيعوها . ياجماعة الكلام اللى باقوله دة مش للكل إلا أن يشاء الله . الكلام دة للى هايركب فى سفينة الإلتزام فالكلام دة له تمن .إدفع تمنه وإدفعى تمنه . تمنه إنك تعيش لربنا .تمنه إنك تقول عاوزك يارب .تمنه إنك إنت تقبل على الله . أقبل ولا تخف . ماتخفش .خذها ولا تخف .. العصا التى شق بها سيدنا موسى البحر كان خايف يمسكها وهى سر فتوح حياته بإذن الله .إوعى تخاف من الإلتزام وإوعى تخافى من الإلتزام .. ياجماعة الشباب المحروم .الشباب اللى غلبان ..الشباب اللى ربنا حرمه ..إسألى نفسك ليه ربنا حرمك. ليه حرمك من القيام ؟ هو أنا عشان ماباقومش الليل دة حرمان . أيوة طبعا حرمان .. ليه حرمك من حبه .ليه حرمك من اليقين به ليه حرمك من لذة ذكره ليه حرمك من الدعوة إلى الله .. كنا مرة منظر مانسهوش وإحنا بنكلم شباب فشاب من الشباب كان قاعد يرقص قبلها ومالى الشارع رقص فى وسط الشارع قلنا إن دى سعادة ليس بعدها سعادة فكلمناه كلمتين عن ربنا فقال " أنا كنت من يومين بس باحاول انتحر"

كل دة وهم وخداع وسراب زى السويد اعلى دخل فى العالم وأعلى نسبة إنتحار فى العالم .. الكلمة دى ربنا قالها ..الشاب ممكن أقف أتكلم معاه فيقول لى طب هى مش حياة الدين حياة خنيقة ؟ بالمصطلح الشبابى حياة خنيقة .كلمة خنيقة هذه ربنا قالها فى القرآن

وَمَنْ يُرِدْ أَن يُضِلَّهُ يَجْعَلْ صَدْرَهُ ضَيِّقًا حَرَجًا كَأَنَّمَا يَصَّعَّدُ فِي السَّمَاءِ " الانعام125



كل أما بتطلع الأوكسجين يقل فتبأى خنقة .. حياة خنييييييييييقة فحياة المعصية حياة خنيقة ..

أنا باقول لكل شاب مقبل على طريق المخدرات ينتظرك أيام أسود من لون المخدرات اللى بتنشرب .. ينتظرك أيام بشعة لو ما توبتش إلى الله .

باقول لكل واحد ناوى يعصى .باقول لكل واحد ناوى يعرض عن الله ينتظرك أيام لا يعلم بها إلا الله سبحانه وتعالى .. ياجماعة عايزين نتوب لربنا . عايزين نتوب فينتظرك أيام رائعة فى الأخرة



... مخرج من المخرجين مات من أسابيع فالدنيا إتقلبت . مخرج داعر فاجر أفلامه كلها قذرة فى المعانى .. وناس دعاة ماتوا فى الفترة اللى فاتت نوروا الدنيا كلها بالنور والهداية .. الدنيا والقنوات اتقلبت للمخرج .. ماتزعلوش ياجماعة ماتزعلوش ... شوفوا أول ما المؤمن يموت بيحصل إيه . السما بتتقلب والأرض بتتقلب بيحصل إيه النبى صلى الله عليه وسلم قال فيما صح عنه ماذا يحدث :




2- صلى عليه كل ملك فى السماء

3- فُتحت له أبواب السماء


4- ما من ملك على باب من أبواب السماء إلا ضرع إلا الله أن تعرج روحه من هذا الباب

5- خرجت روحه كأطيب نفحة مسك وُجدت على وجه الأرض



لما ينزل القبر بتاعه وبعدين يوروا له النار فإيه دة ؟ هذا كان مقامك فى النار لو كنت عصيت الله .. الحمد لله ياااارب اللهم لك الحمد . يفتكر كل مرة كان ناوى ينتكس وربنا عصمه تفتكر كل مرة كانت ناوية تعصى وربنا عصمها ..تفتكر لما كانت مترددة تلبس النقاب ولا لا وعمالة تقيسه ادام المراية وتخلعه وتقيسه وربنا ثبتها ونزلت بيه تفتكر لما كانت على علاقة بشاب وقاعدة مترددة مش قادرة أسيبه .أسيب ولا لا وفى الأخر سبته وضحت بيه عشان ربنا . يفتكر لما كان متردد المال الحرام دة رزقى دة فلوسى وأصرف منين لغاية ما ربنا أعانه وسابه .يفتكر لو كنت عصيت ربنا كان حصل إيه ..أيام رائعة حتى فى القبر حتى فى لحظة الموت تتنزل عليكم الملائكة أفواج ورا أفواج أن لا تخافوا ولا تحزنوا . الفوج دة بيبشرك أنك هاتنظرى إلى وجه الله والفوج دة بيبشرك إنك هاشترب من إيد النبى صلى الله عليه وسلم والفوج دة بيبشرك بالفردوس الأعلى والفوج دة بيبشرك بالأمن من عذاب القبر والفوج دة والفوج دة والفوج دة .. أيااااااام رائعة .. أيام رائعة فى كل حاجة ياجماعة حتى فى القيامة( ولقاهم نظرة وسرورا)الانسان11 .لقاكم يعنى من أول لحظة طالعين كدة الناس واقفين مستنيينك فرحانين بيكِ ما تخافيش كل دة مش ليكى كل دة ماتقلقيش منه خالص .

عبد الرحمن بن عوف لما عائشة رضى الله عنها قالت له إن الأغنياء بيدخلوا بعد الفقرا الجنة قال لها . وماذا أفعل إذا كنت أنفق مائة فيخلف الله على ألف .أعمل إيييييييييييييه .. ظننت أنى لو رفعت حجرا لوجدت تحته ذهبا ..أعمل إيييه إذا كان ربنا فاتحها على الإنسان المتدين يع مل إيه ..

أنا شوفتها بعينى مع أصحابنا الملتزمين فى الدفعة بعد ما تخرجنا لم حطوا إيدهم فى التراب يبأى دهب .هما اللى بيسيبوه عشان مشغولين مش فاضيين .. من كتر فتح أبواب الرزق ينتظرك أيام رائعة لو ربنا حبك .ينتظرك أيام رائعة لو ربنا تولاك ينتظرك أيام رائعة لو ربنا رضى عنك ينتظركم أيام رائعة بس خليه يحبك إزاى ؟ عيش عشانه .خد بالك من الحديث دة امسك قبلك وانتى امسكى قلبك ركزوا معايا . الحديث الرهيب دة الخزاين كلها بتتفح دلوقتى . فإذا أحببته دة مفتاح لكل الخزائن .كل خازنة من خزائن ربنا لها مفتاح إلا " فإذا احببته " مفتاح بيفتح كل الخزائن بيفتح كل حاجة .إمسكى قلبك دلوقتى مع عطاءات ربنا إمسك قلبك معايا .. فإذا أحببته . ولا زال عبدى يتقرب إلى بالنوافل حتى أحبه فإذا أحببته 1- كنت سمعه الذى يسمع به . اول حاجة ربنا قالها السمع .. ليه؟؟ ماهو مش هاتسمع الأغانى والهلس والكلام دة ماعتش هاتسمعه .إنت راكب فى المواصلات ومنتاش سامع طب إشمعن السمع اللى ربنا بدأ بيه؟ لإن السمع دة أول حاجة هاتشهد عليك يوم القيامة " شهد عليهم سمعهم "فصلت20 طب ليه إشمعن؟ لإن اللى إنت إديته ودانك دة اللى هايحدد اتجاههك فى الحياة . إديتى ودانك لداعية ولا لواحد مُفسد .إديت ودانك لواحد صاحب صالح ولا صاحب فاسد

2- وبصره الذى يُبصر به هاتشوف بنور الله ولسانه الذى يتكلم به هايبأى كلامك نور .تكلم أصحابك فى الدين كلهم يلتزموا على إيديك .ويده التى يبطش بها .هاتعيش الحياة وتواجهها بقوة الله سبحانه وتعالى هاتستمد قوتك من قوة الله ورجله التى يمشى بها . هاتبأى مسدد الخطى فى حياتك .فى اختيارتك وفى زواجك .فى اختيارك أختى للزواج وفى كل حاجة وفى شغللك .. ولئن سألنى لأعطينه هاتبأى مجاب الدعاء .ولئن استعاذنى لأعيذنه هاتبأى فى حصن حصين من الله بالله سبحانه وتعالى وفى رواية مسند أبى يعلى " وقلبه الذى يعقل له " هايبأى قلبك دة جنة من الجنات . امسكى قلبك لو ربنا تولاكى ينتظرك أيام رائعة .لو ربنا تولانا ياجماعة أيام رائعة .. الحاجة اللى بتبهرنى وتبهر أى حد لما يسمعها بقلبه قول الله سبحانه وتعالى " اللَّهُ وَلِيُّ الَّذِينَ آَمَنُوا يُخْرِجُهُمْ مِنَ الظُّلُمَاتِ إِلَى النُّورِ "البقرة257 وقفت أدام الأية قلت نور إيه ؟ نور فى الدنيا " وَجَعَلْنَا لَهُ نُورًا يَمْشِي بِهِ فِي النَّاسِ "الانعام122 نور عند الموت ملائكة بيض الوجوه كأن وجوههم الشمس التى تقبض روحه نور فى القبر " افتحوا له بابا إلى الجنة " ييجى له منه من انوار الجنة .. نور فى الصراط لما ربنا سبحانه وتعالى يقول " بُشْرَاكُمُ الْيَوْمَ "الحديد12 وهما لسه جايين يعدوا من على الصراط وربنا سبحانه وتعالى يخليهم يجوزوا كالبرق . البرق دة نور أصلا ياجماعة "َ رَبَّنَا أَتْمِمْ لَنَا نُورَنَا التحريم8" نور على الصراط .. نور فى الحمسين ألف سنة على منابر من نور ..نور وجه الله ونور حجاب النور .. الجنة نفسها زى ما النبى صلى الله عليه وسلم قال نجاف الجنة .الجنة من برة عارفين النجف الفخم والإضاءات الباهرة دة لسه من برة أمال من جوة شكلها إيه .تخيلوا ياجماعة ..أما التانى فحياته كلها ضلمة .حياته كلها خنقة .. ضلمة عند الموت .ملائكة سود الوجوه . ضلمة فى القبر والعياذ بالله " إن هذه القبور مملؤة ظلما على أهلها " ضلمة يوم القيامة . ظلام تام .ضلمة فى النار فهى سوداء مظلمة .ضلمة فى الدنيا .ظلمات بعضها فوق بعض . ياإخوانا هاتختاروا إيه ؟ أنا دلوقتى باخيركم اختاروا ياشباب اختاروا فهدف السلسلة دى إنكوا تختاروا . ياللى لبستى نقاب ولسه لغاية دلوقتى مابتعمليش حاجة فى الدين . اختارى ياللى لسه لغاية دلوقتى مش عايزة تلبسى حجاب أصلا .تختار ياللى لغاية دلوقتى ملتزم بالكلام وخلاص لازم تختار تختار ياللى لسه متردد ومتذبذب . تختار ياللى لسه فى قلبك شهوات وحب الدنيا .تختار ياوالدى وياوالدتى ياللى سايبين والدكم .ياللى بتخافى على بنتك من شوية هوا الشباك يتفتح عليها بليل ومش خايفة عليها من نار جهنم .ياللى خايف على ابنك يوم امتحان الثانوية العامة وقلبك مرعوب ومرجوف معاه ومش خايف عليه من إمتحان القبر . ياللى بنتك بتلبس النقاب فتقولى لها إنتى قضيتى على نفسك إنتى هاتودى نفسك فى داهية .( والتلاتة مليون عانس اللى عندنا ودوا نفسهم فين ؟ والمتبرجات اللى مفيش جواز برغم التبرج بتاعهم ودوا نفسهم فين ) هاتودى نفسها الجنة وفى الدنيا ينتظرها أيام رائعة .ابنك اللى التزم إوعى تقف فى وجهه فينتظره أيام رائعة .بنتك اللى التزمت إنتى وهى وأسرتكم كلها هايبأى أيامكم رائعة لو سبتيها تنطلق فى الدين . اختاروا ياجماعة . أحد إخوانا الدعاة إتشاف له رؤية إنه قاعد يكلم الشباب ويكبر ربنا يكلم الشباب ويكبر ربنا وكل أما يتكلم مع الشباب يعلى فالنبى فى الرؤيا بعت له قال له طول مانتا بتكتبر ربنا وبتتكلم عن الشباب هاتفضل تعلى .أان باقول الكلام دة ليه؟ لإن السلسلة دى مش أنا اللى باديها . أنا وإنتم شركاء فيها .القاطرة انطلقت لإنقاذ أكبر عدد ممكن من أمة سيدنا محمد صلى الله عليه وسلم .أنا عايزكم تبؤا معايا أنا باتكلم من الفضائيات فوق مع الكواكب والنجوم ياجماعة .إنتوا اللى على أرض الواقع إنتوا اللى هاتحولوا الكلام دة عملى معايا إحنا لكنا فريق واحد .كلنا هدف واحد كلنا رسالة واحدة كلنا رمضان دة إن شاء الله بإذن الله لازم ننقذ الشباب على أد ما نقدر حتى اللى قاعد أدامى دلوقتى ولأول مرة بيسمع دين إنت معانا فى الفريق بتاعنا غنت معانا فى القاطرة بتاعتنا إنت معانا فى فريق الأبطال اللى منطلق لربنا سبحانه وتعالى ينتظركم أيام رائعة لوعرفتوا ربنا سبحانه وتعالى .لو ربنا رضى عنك ينتظرك أيام رائعة لَقَدْ رَضِيَ اللَّهُ عَنِ الْمُؤْمِنِينَ إِذْ يُبَايِعُونَكَ تَحْتَ الشَّجَرَةِ " الفتح18 . لما ربنا رضى عن الصحابة عمل لهم إيه .. قوم إقرأها دلوقتى .قومى إقرأيها دلوقتى . أربع صفحات ونصف فتوحات فى سورة الفتح عشان لقد رضى الله .لو ربنا رضى هايحصل إيه ياجماعة خلاص ياجماعة إوعى تقول البيئة فاسدة مش قادر . بيئة إيه يابنى دة قصر فرعون خرج منه تلاتة من عمالقة الإيمان فى تاريخ البشرية : إمرأة فرعون أحد أربع نساء كملوا فى البشرية . مؤمن آل فرعون اللى نزل فيه سورة غافر . ماشطة بنت فرعون اللى النبى صلى الله عليه وسلم وجد ريحها هى واولادها فى السماوات العلا فى رحلة المعراج خرجوا من قصر فرعون فماتقولش البيئة فاسدة وإيه يعنى فاسدة قوم واجتهد وحاول . إوعى تضيع هذه الأيام الجميلة إوعى تضيع هذه الأيام الرائعة مش هاتحس إن الحياة لها طعم إلا فى الدين ياجماعة فلنحيينه حياة طيبة الحياة الطيبة إبراهيم لقاها فى النار . ويوسف لقاها فى السجن والنبى صلى الله عليه وسلم لقاها فى الغار .هاتعيش فى حياة طيبة وحياة سعيدة وحياة جميلة . هاتبأى بتبكى فى التراويح من الخوف من النار وقلبك بيرقص من الفرحة . أيام رائعة ياجماعة أيام جميلة أوى أيامنا الحلوة . ينتظركم أيام رائعة أوعوا تضيعوها ماتبؤش زى روماريو اللى عمال يحسد فى رونالدوا ويقول ينتظره أيام رائعة والأخر رونالدو حصل له تلات تمزقات فى أربطة رجليه ومهدد باعتزال الملاعب .اتنش عين من روماريو جبته الأرض . سبحان الله العظيم .لو كان رونالدوا مسلم وبيقول أذكار الصباح والمساء زى الشباب الحلو بتاعنا اللى إن شاء الله هايعمل كدة بإذن الله من أول الفجر اللى جاى دة كان ربنا سترها معاه أوى جيم أوفر يارونالدوا . جيم اوفر ياروماريوا . جيم اوفر ياكل واحد عصيت ربنا ومشيت فى طرق المعصية جيم اوفر ياكل واحد حاسس غن المعصية فيها سعادة ولا المخدرات فيها سعادة ولا سكة البنات و البلاجات فيها سعادة .جيم اوفر ياكل واحدة ماردتش تتحجب وماردتش تقبل على ربها .جيم اوفر ياممثلة عندها تسعين سنة ولسه بتبوسى جزمة الدنيا والدنيا بتديكى بالجزمة وإنتى لسه عايزة تتصابى .جيم اوفر ياكل واحد عصى ربنا وعاند ربنا .خلاص خسرانة خسرانة انتهى مادام فى طريق غير طريق ربنا . جيم اوفر ياشباب أمة محمد اللى هايتوب ويعرف ربنا بس مش جيم أوفر خسرانين لا والله الجيم هايخلص واحنا كلنا كسبانين . الجيم هايخلص واحنا كلنا منتصرين على شهواتنا فرحانين لإن مع ربنا ماحدش بيخسر أبدا .مع ربنا مفيش حاجة بتضيع أبدا .. أنا عايزكوا ياجماعة تختاروا أنا عايزكوا تلاتين يوم مع بعض إن شاء الله هانتكلم عن مشاكل اللى عاوز بس خايف أنا عايز أبتسم بس خايف .هى حياة الدين مش صعبة مش ضيقة؟ اللى عايز بس مش قادر .اللى عايز يرجع لربنا .اللى عايز ينطلق فى الدين اللى التزم بس حاسس غنه مش بيتقدم فى دين ربنا اللى عنده مشاكل كل أما ييجى يطب يقع اللى عنده مشاكل كل أما ييجى ينطلق يلاقى عقبات أدامه اللى عايز يوصل اللى عايز يدخل طريق ربنا بس فيه شبهات ضد الطريق فى قلبه اللى عايز اللى عايز كل دول هانعالج مشاكلهم بإذن الملك على مدى التلاتين يوم بتوع رمضان كل يوم تستنونا بعد الفطار بإذن الله سبحانه وتعالى .يعنى هانفطر عليك كل يوم ؟ أه إن شاء الله هاتفطروا على كل يوم معنديش مانع والله ياجماعة بس نعرف ربنا ونتوب لربنا ونحب ربنا وقلوبنا تمشى كلمة الله فيها مزلزلاها من كتر حب ربنا وحب طريق الملك سبحانه وتعالى ..حياة الدين كلها سعادة ياشباب .. ياشباب يأباء وياأمهات انتوا اللى هاتتأثروا على ولادكم تأثير حقيقى .انتوا شركاء معانا فى الموضوع دة انتوا مجاهدين معانا فى الموضوع دة ..

الأم اللى وقفتنى فى الشارع تبكى بالدموع على ابنها .

الأب اللى قعد يجرى ورايا فى التليفون هايموت على ابنه هاييجى له ذبحة صدرية من اللى ابنه عامله فيه .

الأمهات اللى ياما الواحد قابلهم فى الطريق بكوا دم أدام الواحد وفى التليفون هانعمل إيه فى ولادنا . أهى فرصة اهى .فرصة كلنا نشترك فيها . اللى عايز الحلقات بإذن الله من على موقع الطريق إلى الله www.way2allah.com اللى عايز يحملهم وينزلها ويطبعها للشباب . اللى عايز ينشر الدين اللى عايز ينطلق معانا فى القاطرة .اللى عايز يجاهد من أجل إنقاذ شباب أمة محمد إحنا موجودين كل يوم مع بعض بعد الفطار بإذن الله سبحانه وتعالى ماتنسوش دروس الشيخ محمد حسان بتاعة الصحابة سلسلة خطيرة إوعوا تضيعووها فهى نقلة على إديدين مشايخنا الأفاضل ماتنسوش التراويح والتهجد وماتنسوش ربنا أبدا وماتنسوش حياة الطاعة وماتنساش أبدا إن طول ما إنت فى الطريق دة ينتظرك أيام رائعة .. اللهم تب علينا لنتوب اللهم تب علينا توبة ترضى بها عنا اللهم فرح قلوبنا بدينك اللهم فرح قلوبنا بطاعتك اللهم أذهب قلوبنا بقيام الليل بين يديك اللهم زوج الصالحين بالصالحات وزوج الصالحات بالصالحين اللهم إملأ حياة الملتزمين والملتزمات بالأفراح والأنوار اللهم أعطهم وافتح عليهم الله أمدهم بمدد من عندك اللهم أنقذ شباب أمة محمد صلى الله عليه وسلم اللهم تب عليهم اللهم لا أمل لنا إلا فيك ولا بلاغ لنا إليك إلا بك اللهم أنت رجاؤنا لا نهلك وأنت رجاؤنا لا نهلك وانت رجاؤنا لا نهلك وأنت رجاؤنا اللهم إن أعداء هذا الدين قد تكالبوا على الشباب يفسدوهم ويحطموهم ويوردوهم المهالك اللهم فانصر أمة حبيبك اللهم أنقذ شباب أمة محمد صلى الله عليه وسلم اللهم انقذهم اللهم أحيهم ياإلهى القدير اللهم انقذهم الله احيى قلوبهم اللهم ارزقنا الصدق والإخلاص وتب علينا واقبلنا على ماكان منا برحمتك ياأرحم الراحمين .


سبحانك اللهم وبحمدك نشهد أن لا إله إلا أنت نستغفرك ونتوب إليك
وجزاكم الله خيرا


::

   طباعة 
0 صوت
التعليقات
جديد المواد
جديد المواد
مش حتقدر تغمض عنيك - تفريغ دروس منوعه للشيخ **حازم شومان**
تفريغ درس " ماذا لو تكلم الكفن" - تفريغ دروس منوعه للشيخ **حازم شومان**
عايز بس مش قادر ...... الجزء الاول ؟!! - تفريغ دروس منوعه للشيخ **حازم شومان**
الافتقار إلى الله لد/شومان - تفريغ دروس منوعه للشيخ **حازم شومان**
الثقة في الله - الدرس وتفريغه د/ شومان - تفريغ دروس منوعه للشيخ **حازم شومان**
القائمة الرئيسية
تلاوات تعليمية واحكام التجويد بالصوت والصورة


هل أعجبك هذا المحتوى ؟

>>> شارك الموقع مع أصدقاء على الفايسبوك والدال على الخير كفاعله <<<
facebook share islamic

إضغط هنا للمشاركة


هل أعجبك هذا المحتوى ؟

اسطوانات وزارة التربية والتعليم وتطبيقات للموبايل
Powered by: MktbaGold 6.6